16-26 июль кунлари Қорақалпоғистон Республикаси, вилоятлар ва Тошкент шаҳридаги масжидларда фаолият юритаётган 84 нафар воиз имом-хатиблар учун малака ошириш ўқувлари ташкил этилди.
Диний-маърифий соҳада малака ошириш ва қайта тайёрлаш институтида 10 кун мобайнида нотиқ имомлар учун “Замонавий ахборот маконида диний-маърифий соҳа мутахассисларининг медиа-тарғибот фаолиятини такомиллаштиришнинг долзарб жиҳатлари” йўналишида 72 соатлик ўқувлар ўтказилди.
Машғулотлар давомида таниқли уламолар, профессор-ўқитувчилар ва соҳадаги энг малакали устозлар ўз билим ва тажрибаларини етказдилар.
Шу йил, 26 июль куни Ўзбекистон халқаро исломшунослик академиясида ўқув курсини муваффақиятли якунлаган имомларга сертификат топшириш маросими бўлиб ўтди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари иштирок этиб, диний-маърифий соҳадаги янгиланишлар, имом-хатибларга кўрсатилаётган эътиборни сўзлаш баробарида бугунги мураккаб даврда имом домлалардан ҳам ўз билим ва малакаларини ошириб боришни замоннинг ўзи тақозо этаётганини таъкидладилар. Шунингдек, масжид минбари, турли йиғинлар ва ижтимоий тармоқларда чиқиш қилишда имом-хатиб эътибор қиладиган муҳим жиҳатлар, нотиқлик одоби ва янги давр талабларига батафсил тўхталдилар.
Ўзбекистон Республикаси Дин ишлари бўйича қўмитаси раисининг биринчи ўринбосари Давронбек Махсудов диний-маърифий соҳада малака ошириш ва қайта тайёрлаш курсларининг долзарблиги, тарғибот-ташвиқот ишларида имом-хатибларининг ўрни ва келгусидаги вазифалари ҳақида сўзлади.
Воиз имом-хатибларга муфтий Шайх Нуриддин Холиқназар ҳазратлари томонидан сертификатлар топширилиб, хайрли дуолар қилинди.
***
16-26 iyul kunlari Qoraqalpog‘iston Respublikasi, viloyatlar va Toshkent shahridagi masjidlarda faoliyat yuritayotgan 84 nafar voiz imom-xatiblar uchun malaka oshirish o‘quvlari tashkil etildi.
Diniy-ma’rifiy sohada malaka oshirish va qayta tayyorlash institutida 10 kun mobaynida notiq imomlar uchun “Zamonaviy axborot makonida diniy-ma’rifiy soha mutaxassislarining media-targ‘ibot faoliyatini takomillashtirishning dolzarb jihatlari” yo‘nalishida 72 soatlik o‘quvlar o‘tkazildi.
Mashg‘ulotlar davomida taniqli ulamolar, professor-o‘qituvchilar va sohadagi eng malakali ustozlar o‘z bilim va tajribalarini yetkazdilar.
Shu yil, 26 iyul kuni O‘zbekiston xalqaro islomshunoslik akademiyasida o‘quv kursini muvaffaqiyatli yakunlagan imomlarga sertifikat topshirish marosimi bo‘lib o‘tdi. Unda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtirok etib, diniy-ma’rifiy sohadagi yangilanishlar, imom-xatiblarga ko‘rsatilayotgan e’tiborni so‘zlash barobarida bugungi murakkab davrda imom domlalardan ham o‘z bilim va malakalarini oshirib borishni zamonning o‘zi taqozo etayotganini ta’kidladilar. Shuningdek, masjid minbari, turli yig‘inlar va ijtimoiy tarmoqlarda chiqish qilishda imom-xatib e’tibor qiladigan muhim jihatlar, notiqlik odobi va yangi davr talablariga batafsil to‘xtaldilar.
O‘zbekiston Respublikasi Din ishlari bo‘yicha qo‘mitasi raisining birinchi o‘rinbosari Davronbek Maxsudov diniy-ma’rifiy sohada malaka oshirish va qayta tayyorlash kurslarining dolzarbligi, targ‘ibot-tashviqot ishlarida imom-xatiblarining o‘rni va kelgusidagi vazifalari haqida so‘zladi.
Voiz imom-xatiblarga muftiy Shayx Nuriddin Xoliqnazar hazratlari tomonidan sertifikatlar topshirilib, xayrli duolar qilindi.
