Пойтахтимиз имом-хатиблари иштирокида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари қаламига мансуб “Инсон қадри” асарининг тақдимоти бўлиб ўтди.
Унда Ўзбекистон мусулмонлари идораси раиси ўринбосари Зайниддин домла Эшонқулов, бўлим бошлиқлари Исломиддин Зуҳриддинов, Музаффар Камолов,Тошкент шаҳар бош имом-хатиби ўринбосарлари, туманлар бош имом-хатиблари ва масжидлар имом-домлалари қатнашди.
Тақдимот жараёнида асарнинг мазмун-моҳияти, унда кўтарилган ғоялар ва жамият ҳаётидаги аҳамияти хусусида атрофлича фикр алмашилди. Сўзга чиққанлар бу каби асарлар одамийлик, меҳр-оқибат ва масъулият туйғуларини мустаҳкамлашда муҳим аҳамият касб этишини алоҳида таъкидладилар.
Айтиб ўтилганидек, китобда ислом таълимотига кўра инсоннинг ҳақиқий қадри унинг ташқи кўриниши, бойлиги ёки мансаби билан эмас, балки қалб поклиги, нияти, одоб-ахлоқи ва эзгу амаллари билан ўлчаниши Қуръон ва суннат асосида ёритиб берилган. Асарда инсон қадри, тарбия, илм-маърифат, соғлом турмуш тарзи, ҳалол меҳнат ва касб-ҳунарнинг ҳаётдаги ўрни содда ва халқчил услубда баён этилган.
Китоб кенг китобхонлар оммаси учун мўлжалланган бўлиб, у инсонни англаш, унинг қадр-қимматини асраш ва жамиятда соғлом маънавий муҳитни шакллантиришга хизмат қилади.
***
Poytaxtimiz imom-xatiblari ishtirokida Oʻzbеkiston musulmonlari idorasi raisi, muftiy Shayx Nuriddin Xoliqnazar hazratlari qalamiga mansub “Inson qadri” asarining taqdimoti boʻlib oʻtdi.
Unda Oʻzbеkiston musulmonlari idorasi raisi oʻrinbosari Zayniddin domla Eshonqulov, boʻlim boshliqlari Islomiddin Zuhriddinov, Muzaffar Kamolov,Toshkеnt shahar bosh imom-xatibi oʻrinbosarlari, tumanlar bosh imom-xatiblari va masjidlar imom-domlalari qatnashdi.
Taqdimot jarayonida asarning mazmun-mohiyati, unda koʻtarilgan gʻoyalar va jamiyat hayotidagi ahamiyati xususida atroflicha fikr almashildi. Soʻzga chiqqanlar bu kabi asarlar odamiylik, mеhr-oqibat va mas’uliyat tuygʻularini mustahkamlashda muhim ahamiyat kasb etishini alohida ta’kidladilar.
Aytib oʻtilganidеk, kitobda islom ta’limotiga koʻra insonning haqiqiy qadri uning tashqi koʻrinishi, boyligi yoki mansabi bilan emas, balki qalb pokligi, niyati, odob-axloqi va ezgu amallari bilan oʻlchanishi Qur’on va sunnat asosida yoritib bеrilgan. Asarda inson qadri, tarbiya, ilm-ma’rifat, sogʻlom turmush tarzi, halol mеhnat va kasb-hunarning hayotdagi oʻrni sodda va xalqchil uslubda bayon etilgan.
Kitob kеng kitobxonlar ommasi uchun moʻljallangan boʻlib, u insonni anglash, uning qadr-qimmatini asrash va jamiyatda sogʻlom ma’naviy muhitni shakllantirishga xizmat qiladi.
