Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Макка шаҳрида истиқомат қилаётган зиёратчилар билан учрашиб, уларга мазмунли мавъиза қилдилар. Суҳбат давомида ҳаж ибодатининг нақадар улуғ ва фазилатли амал экани, бу муборак сафарнинг инсон қалби, иймони ва ҳаётидаги ўрни ҳақида атрофлича тўхталиб ўтилди. Шунингдек, ҳажнинг мақбул бўлиши, унинг ажру савоби ва гуноҳларга каффорат бўлиши ҳақидаги ҳадиси шарифлар шарҳланиб, зиёратчиларга ҳаж савоби, ҳожилик одоби ва фазилатлари хусусида муҳим насиҳатлар берилди.
Муфтий ҳазратлари ўз сўзларида бугунги кунда Ўзбекистон ҳожиларига яратилаётган кенг имконият ва ғамхўрликларга алоҳида тўхталиб, муҳтарам Президентимиз ҳар куни ҳамюртларимиз саломатлиги, ибодатлари ва уларга кўрсатилаётган хизматлар ҳақида хабардор бўлиб тураётганлари барча юртдошлар учун катта фахр экани айтдилар.
Шунингдек, Ўзбекистон тарихида илк бор 100 нафар юртдошимиз “Президент ҳожиси” сифатида ҳаж сафарига юборилаётгани ҳам катта эътибор ва ғамхўрлик намунаси экани қайд этилди. Улар орасида турли соҳа вакиллари — оддий меҳнаткашлар, зиёлилар, жамият тараққиётига ҳисса қўшган фахрийлар, собиқ муфтийлар оилалари ҳамда дуогўй мўйсафидлар борлиги таъкидланди.
Муфтий ҳазратлари яқинда Қозоғистонда Ўзбекистон томонидан янги масжид бунёд этилиб, у қозоқ халқига туҳфа қилингани ҳам қувончли воқеа бўлганини айтиб, бу каби хайрли ва савобли ишлар мусулмонлар ўртасидаги биродарлик ва ҳамжиҳатликни мустаҳкамлашга хизмат қилишини таъкидлади.
Суҳбат якунида муборак манзилу маконларда юрт тинчлиги, халқ фаровонлиги, Давлатимиз Раҳбари ҳаққига дуолар қилиш ва зиёратчилармизнинг ибодатлари қабул бўлишини сўраб, илтижолар қилиш зарурлиги таъкидланди.
***
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Makka shahrida istiqomat qilayotgan ziyoratchilar bilan uchrashib, ularga mazmunli mav’iza qildilar. Suhbat davomida haj ibodatining naqadar ulug‘ va fazilatli amal ekani, bu muborak safarning inson qalbi, iymoni va hayotidagi o‘rni haqida atroflicha to‘xtalib o‘tildi. Shuningdek, hajning maqbul bo‘lishi, uning ajru savobi va gunohlarga kafforat bo‘lishi haqidagi hadisi shariflar sharhlanib, ziyoratchilarga haj savobi, hojilik odobi va fazilatlari xususida muhim nasihatlar berildi.
Muftiy hazratlari o‘z so‘zlarida bugungi kunda O‘zbekiston hojilariga yaratilayotgan keng imkoniyat va g‘amxo‘rliklarga alohida to‘xtalib, muhtaram Prezidentimiz har kuni hamyurtlarimiz salomatligi, ibodatlari va ularga ko‘rsatilayotgan xizmatlar haqida xabardor bo‘lib turayotganlari barcha yurtdoshlar uchun katta faxr ekani aytdilar.
Shuningdek, O‘zbekiston tarixida ilk bor 100 nafar yurtdoshimiz “Prezident hojisi” sifatida haj safariga yuborilayotgani ham katta e’tibor va g‘amxo‘rlik namunasi ekani qayd etildi. Ular orasida turli soha vakillari — oddiy mehnatkashlar, ziyolilar, jamiyat taraqqiyotiga hissa qo‘shgan faxriylar, sobiq muftiylar oilalari hamda duogo‘y mo‘ysafidlar borligi ta’kidlandi.
Muftiy hazratlari yaqinda Qozog‘istonda O‘zbekiston tomonidan yangi masjid bunyod etilib, u qozoq xalqiga tuhfa qilingani ham quvonchli voqea bo‘lganini aytib, bu kabi xayrli va savobli ishlar musulmonlar o‘rtasidagi birodarlik va hamjihatlikni mustahkamlashga xizmat qilishini ta’kidladi.
Suhbat yakunida muborak manzilu makonlarda yurt tinchligi, xalq farovonligi, Davlatimiz Rahbari haqqiga duolar qilish va ziyoratchilarmizning ibodatlari qabul bo‘lishini so‘rab, iltijolar qilish zarurligi ta’kidlandi.
