Бугун, 22 февраль куни Фарғона шаҳар “Уммул қуро” масжидида вилоятимизда фаолият кўрсатаётган имом-хатиблар ва муаззинлар иштирокида тадбир бўлиб ўтди. Унда вилоят бош имом-хатиби Убайдуллоҳ домла Абдуллаев ва вилоят бош имом-хатиби ўринбосари Алишер домла Наимовлар қатнашишди.
Тадбирда вилоят бош имом-хатиби ўринбосари Алишер домла Наимов юртимизда диний-маърифий соҳада амалга оширилаётган ишлар, жорий йилнинг 17 февраль куни “Масжидлар ва диний таълим муассасаларида тозалик ва ободонлаштириш ишларини амалга ошириш, санитария-гигиена қоидаларига риоя этилишини назоратга олиш ва муқаддас Рамазон ойига тайёргарлик кўриш” мақсадида ZOOM платформаси орқали йиғилишда белгиланган вазифаларни амалга ошириш ҳақида гапириб ўтди.
Шундан сўнг вилоят бош имом-хатиби Убайдуллоҳ домла Абдуллаев масжид ходимлари томонидан амалга оширилаётган ижобий ишлар, шу билан бирга йўл қўйилаётган камчиликлар борасида сўз юритиб, масжид ходимлари, хусусан муаззинлар олдида турган масъулият ҳақида тўхталди.
Тадбир якунида 16-17 февраль кунлари ташкил этилган семинар-тренингни муваффақиятли якунлаган муаззинларга махсус сертификат топширилди.
