Айни кунларда Ўзбекистон мусулмонлари идораси тасарруфидаги Қорақалпоғистон Республикаси, Тошкент шаҳри ва вилоятлардаги масжидларда Рамазон ойини муносиб тарзда кутиб олиш бўйича кенг кўламли тайёргарлик ишлари олиб борилмоқда. Жумладан, масжидларда ободонлаштириш, тозалик, намозхонлар учун қулай шароитларни ҳозирлаш каби ишлар давом этмоқда.
Шу муносабат билан Ўзбекистон мусулмонлари идораси раиси, муфтий Шайх Нуриддин Холиқназар ҳазратлари сафар давомида Наманган вилоятидаги “Исҳоқ ҳожи”, “Абу Юсуф”, “Имом Бухорий”, “Форуқ”, «Шодибек» сингари жоме масжидларда Рамазон ойига тайёргарлик жараёни билан яқиндан танишиб, мутасаддилларга тегишли кўрсатма ва тавсиялар бердилар.
Муфтий ҳазратлари имом-домлалар билан учрашувда тобора яқинлашиб келаётган Рамазони шарифда ўтган йил бошланган яхши анъана, яъни масжидларда 27 кунлик хатми Қуръон ва таровиҳ намозлари бўлиши, шу йилдан энг маҳоратли қорилар юртимизнинг айрим ҳудудларида жомеларида навбат билан бир кунлик намунавий хатм ўтиб бериш анъанаси йўлга қўйилаётгани, бу масжидларимиздаги хатми Қуръонларнинг янада гўзал ва файзли ўтишига сабаб бўлишини алоҳида қайд этдилар.
Самимий мулоқотларда кейинги йилларда мамлакатимизда маҳалла фуқаролар йиғини фаолиятига алоҳида эътибор қаратилаётгани, уларда халқимизнинг оғири енгил бўлаётгани, хусусан, масжид имом-хатиблари ҳам ҳамкор ташкилотлар билан кўплаб хайрли ишлар қилаётгани, эҳтиёжманд ва илмсизлиги туфайли билмасдан ёт ғоялар таъсирига тушиб қолган фуқароларга моддий ва маънавий кўмак бериш борасида салмоқли натижаларга эришилаётгани алоҳида таъкидланди.
Ўзбекистон мусулмонлари идораси
Матбуот хизмати
***
Ayni kunlarda O‘zbekiston musulmonlari idorasi tasarrufidagi Qoraqalpog‘iston Respublikasi, Toshkent shahri va viloyatlardagi masjidlarda Ramazon oyini munosib tarzda kutib olish bo‘yicha keng ko‘lamli tayyorgarlik ishlari olib borilmoqda. Jumladan, masjidlarda obodonlashtirish, tozalik, namozxonlar uchun qulay sharoitlarni hozirlash kabi ishlar davom etmoqda.
Shu munosabat bilan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari safar davomida Namangan viloyatidagi “Is’hoq hoji”, “Abu Yusuf”, “Imom Buxoriy”, “Foruq”, «Shodibek» singari jome masjidlarda Ramazon oyiga tayyorgarlik jarayoni bilan yaqindan tanishib, mutasaddillarga tegishli ko‘rsatma va tavsiyalar berdilar.
Muftiy hazratlari imom-domlalar bilan uchrashuvda tobora yaqinlashib kelayotgan Ramazoni sharifda o‘tgan yil boshlangan yaxshi an’ana, ya’ni masjidlarda 27 kunlik xatmi Qur’on va tarovih namozlari bo‘lishi, shu yildan eng mahoratli qorilar yurtimizning ayrim hududlarida jomelarida navbat bilan bir kunlik namunaviy xatm o‘tib berish an’anasi yo‘lga qo‘yilayotgani, bu masjidlarimizdagi xatmi Qur’onlarning yanada go‘zal va fayzli o‘tishiga sabab bo‘lishini alohida qayd etdilar.
Samimiy muloqotlarda keyingi yillarda mamlakatimizda mahalla fuqarolar yig‘ini faoliyatiga alohida e’tibor qaratilayotgani, ularda xalqimizning og‘iri yengil bo‘layotgani, xususan, masjid imom-xatiblari ham hamkor tashkilotlar bilan ko‘plab xayrli ishlar qilayotgani, ehtiyojmand va ilmsizligi tufayli bilmasdan yot g‘oyalar ta’siriga tushib qolgan fuqarolarga moddiy va ma’naviy ko‘mak berish borasida salmoqli natijalarga erishilayotgani alohida ta’kidlandi.
O‘zbekiston musulmonlari idorasi
Matbuot xizmati
