Ўзбекистон мусулмонлари идораси тасарруфидаги «Шамсуддинхон Бобохонов» нашриёт-матбаа ижодий уйи томонидан нашр этиб келинаётган «Ҳидоят» ва «Мўминалар» журналлари ҳамда «Ислом нури» газетаси халқимизга маърифат ва ҳидоят улашишда муҳим ўрин тутиб келаётган нуфузли нашрлардан ҳисобланади. Ушбу нашрлар орқали кенг жамоатчиликка диний-маърифий мазмундаги долзарб мавзулар, ҳаётий масалалар, одоб-ахлоқ, тарбия ва маънавиятга оид илмий-оммабоп мақолалар мунтазам равишда етказиб борилмоқда.
Дарҳақиқат, мазкур нашрларнинг халқимиз орасида кенг тарқалишида имом-хатиблар ва масжидларнинг ўрни беқиёсдир. Масжидлар нафақат ибодат маскани, балки маърифат ва тарбия ўчоғи сифатида ҳам хизмат қилиб, ўқувчилар ва нашрлар ўртасида мустаҳкам кўприк вазифасини бажариб келмоқда. Шу боис ушбу нашрларнинг аҳоли ўртасидаги ўқувчилари сони ортиб бораётгани, уларга бўлган қизиқишнинг кучайиб бораётгани қувонарли ҳолдир.
«Шамсуддинхон Бобохонов» нашриёт-матбаа ижодий уйи масъуллари иштирокида вилоят вакиллиги мажлислар залида тадбир бўлиб ўтди. Унда «Ҳидоят» ва «Мўминалар» журналлари ҳамда «Ислом нури» газетасининг жамият ҳаётидаги ўрни, улар орқали бериб борилаётган мазмунли ва долзарб мақолаларнинг аҳамияти ҳақида тўхталинди.
Тадбирда таъкидланганидек, мазкур нашрларда эълон қилинаётган илмий-оммабоп, тарбиявий ва маърифий мақолалар ўқувчилар томонидан катта қизиқиш билан қарши олинмоқда. Таҳририятга келиб тушаётган кўплаб мурожаатлар, фикр ва таклифлар ҳам бунинг ёрқин исботидир. Айниқса, Фарғона вилояти ўқувчиларининг фаоллиги, нашрларга бўлган қизиқиши ва обуна маданияти алоҳида эътироф этилди.
Шунингдек, тадбир давомида мазкур нашрларни тарғиб қилиш, обуна ишларини юқори савияда ташкил этишда фаоллик кўрсатган бир қатор имом-хатиблар ва масъуллар нашриёт томонидан муносиб тақдирланди.
***
O‘zbekiston musulmonlari idorasi tasarrufidagi «Shamsuddinxon Boboxonov» nashriyot-matbaa ijodiy uyi tomonidan nashr etib kelinayotgan «Hidoyat» va «Mo‘minalar» jurnallari hamda «Islom nuri» gazetasi xalqimizga maʼrifat va hidoyat ulashishda muhim o‘rin tutib kelayotgan nufuzli nashrlardan hisoblanadi. Ushbu nashrlar orqali keng jamoatchilikka diniy-maʼrifiy mazmundagi dolzarb mavzular, hayotiy masalalar, odob-axloq, tarbiya va maʼnaviyatga oid ilmiy-ommabop maqolalar muntazam ravishda yetkazib borilmoqda.
Darhaqiqat, mazkur nashrlarning xalqimiz orasida keng tarqalishida imom-xatiblar va masjidlarning o‘rni beqiyosdir. Masjidlar nafaqat ibodat maskani, balki maʼrifat va tarbiya o‘chog‘i sifatida ham xizmat qilib, o‘quvchilar va nashrlar o‘rtasida mustahkam ko‘prik vazifasini bajarib kelmoqda. Shu bois ushbu nashrlarning aholi o‘rtasidagi o‘quvchilari soni ortib borayotgani, ularga bo‘lgan qiziqishning kuchayib borayotgani quvonarli holdir.
«Shamsuddinxon Boboxonov» nashriyot-matbaa ijodiy uyi masʼullari ishtirokida viloyat vakilligi majlislar zalida tadbir bo‘lib o‘tdi. Unda «Hidoyat» va «Mo‘minalar» jurnallari hamda «Islom nuri» gazetasining jamiyat hayotidagi o‘rni, ular orqali berib borilayotgan mazmunli va dolzarb maqolalarning ahamiyati haqida to‘xtalindi.
Tadbirda taʼkidlanganidek, mazkur nashrlarda eʼlon qilinayotgan ilmiy-ommabop, tarbiyaviy va maʼrifiy maqolalar o‘quvchilar tomonidan katta qiziqish bilan qarshi olinmoqda. Tahririyatga kelib tushayotgan ko‘plab murojaatlar, fikr va takliflar ham buning yorqin isbotidir. Ayniqsa, Farg‘ona viloyati o‘quvchilarining faolligi, nashrlarga bo‘lgan qiziqishi va obuna madaniyati alohida eʼtirof etildi.
Shuningdek, tadbir davomida mazkur nashrlarni targ‘ib qilish, obuna ishlarini yuqori saviyada tashkil etishda faollik ko‘rsatgan bir qator imom-xatiblar va masʼullar nashriyot tomonidan munosib taqdirlandi.
