Масжидлар — Аллоҳнинг байти. Кун сайин бу даргоҳга келиб, ибодат қилувчилар сони ортаётгани барчани хурсанд қилади. Бугун масжидларга кириб дилингиз яйрайди. Айниқса, жума ва ҳайит кунлари байтуллоҳга келувчилар бошқа кунларга нисбатан бир неча баробар кўп. Шу эътибордан бугун масжидларда ибодатга келувчилар учун қулай шарт-шароит ва кенг имкониятлар яратилмоқда.
Ҳозирда Қўштепа туманида 15 та масжид фаолият олиб бормоқда. Тумандаги масжидларда ибодатга келувчилар учун кенг имкониятлар яратилган ва айни вақтда бу борадаги ислоҳотлар давом этмоқда. «Ғиштмон» жоме масжиди ҳам катталиги, миллий ва замонавий усулда қурилгани билан ажралиб туради. Қайд этиш лозимки, масжид туманнинг Ғиштмон, Қийқи, Намуна, Қамиштепа, Қизил ариқ ва Карнайчи маҳалла аҳолисига хизмат қилади.
Бугун, 18 май куни мазкур жомеда тадбир бўлиб ўтди. Унда вилоят бош имом-хатиби Убайдуллоҳ домла Абдуллаев, имом-хатиблар ва бир гуруҳ нуронийлар иштирок этди. Тадбирда юртимизда диний-маърифий соҳада амалга оширилаётган ислоҳотлар, хусусан, масжидларни обод қилиш борасида амалга оширилаётган ишлар эътироф этилиб, «Ғиштмон» жомесига янги қўшимча хонақоҳ қурилиши ҳам ушбу ислоҳотларнинг бир мисолидир, дея қайд этилди.
Янги хонақоҳ биноси 1500 дан ортиқ намозхонни ўз бағрига олади. Лойиҳада миллий ва замонавий архитектура услуби уйғунлашган. Қолаверса, бинонинг мустаҳкамлиги, иссиқ ва совуқ об ҳаво шароитида мўътадил бўлишига алоҳида эътибор қаратилган.
Тадбирда «Ғиштмон» масжидида кўп йиллар давомида хизмат қилган Алимбек домла Илёсовнинг меҳнати тилга олиниб, масжид жамоасининг ҳадяси топширилди. Тадбир якунида Қуръон тиловат қилиниб, юртимиз тинчлиги, халқимиз фаровонлиги, динимиз ривожи ҳамда бошланган қурилиш ишларига яхшилик сўраб дуо қилинди.
