Бугун, 27 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари раисликларида Наманган вилоятида фаолият юритаётган имом-хатиблар мажлиси бўлиб ўтди.
Йиғилиш Қуръони карим тиловати ва хайрли дуолар билан бошланди.
Учрашув аввалида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари юртимиз тараққиётининг янги даврида диний соҳада жуда катта ислоҳотлар амалга оширилаётгани, соҳа вакиллари олдида турган муҳим вазифалар ҳақида сўз юритиб, имомлик шарафли мақом бўлиши билан бирга ўта нозик ва масъулиятли иш экани, ҳар бир имом бу ҳақиқатни бир зум бўлса-да эсидан чиқармаслиги ва жамиятнинг энг намунали ва олди кишиси бўлиши лозимлигига урғу қаратдилар.
Таҳлилий руҳда ўтган мажлисда Муфтий ҳазратлари кейинги йилларда Наманган вилоятида диний-маърифий соҳада кўплаб ижобий ишлар амалга оширилаётгани, имом-хатиблар шариат ходими сифатида мўмин-мусулмон халқимизни тўғри йўлга бошлаш ва хайрия ишларида фаоллик борасидаги хизматлари катта эканини алоҳида таъкидладилар. Шунингдек, баъзи имом-хатиблар фаолиятида камчиликлар кўзга ташланаётганини айтиш баробарида улар ўзларини ислоҳ қилишлари лозимлигини алоҳида қайд этдилар.
Йиғилиш давомида Рамазон ойини муносиб кутиб олиш ва уни кўтаринки руҳда ўтказиш бўйича тегишли кўрсатма ва тавсиялар берилди.
* * *
Bugun, 27 fevral kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari raisliklarida Namangan viloyatida faoliyat yuritayotgan imom-xatiblar majlisi bo‘lib o‘tdi.
Yig‘ilish Qur’oni karim tilovati va xayrli duolar bilan boshlandi.
Uchrashuv avvalida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari yurtimiz taraqqiyotining yangi davrida diniy sohada juda katta islohotlar amalga oshirilayotgani, soha vakillari oldida turgan muhim vazifalar haqida so‘z yuritib, imomlik sharafli maqom bo‘lishi bilan birga o‘ta nozik va mas’uliyatli ish ekani, har bir imom bu haqiqatni bir zum bo‘lsa-da esidan chiqarmasligi va jamiyatning eng namunali va oldi kishisi bo‘lishi lozimligiga urg‘u qaratdilar.
Tahliliy ruhda o‘tgan majlisda Muftiy hazratlari keyingi yillarda Namangan viloyatida diniy-ma’rifiy sohada ko‘plab ijobiy ishlar amalga oshirilayotgani, imom-xatiblar shariat xodimi sifatida mo‘min-musulmon xalqimizni to‘g‘ri yo‘lga boshlash va xayriya ishlarida faollik borasidagi xizmatlari katta ekanini alohida ta’kidladilar. Shuningdek, ba’zi imom-xatiblar faoliyatida kamchiliklar ko‘zga tashlanayotganini aytish barobarida ular o‘zlarini isloh qilishlari lozimligini alohida qayd etdilar.
Yig‘ilish davomida Ramazon oyini munosib kutib olish va uni ko‘tarinki ruhda o‘tkazish bo‘yicha tegishli ko‘rsatma va tavsiyalar berildi.
