Яқиндагина интиқлик билан кутганимиз Рамазон ойи ҳам якунланиб бормоқда. Саховатпеша халқимиз бу ойда ҳам ўзининг қанчалик юксак ҳиммат эгаси эканини кўрсатди, десак муболаға қилмаган бўламиз.
Муборак ойнинг сўнгги ўн кунлиги ҳамда Рамазон ҳайити арафасида Ўзбекистон тумани бош имом-хатиби Адҳамжон домла Юлдашев ташаббуси билан ҳомийларни жалб этган ҳолда тумандаги боқувчисини йўқотган, бемор ва етимлари бўлган 130 та хонадон ҳолидан хабар олинди ҳамда озиқ-овқат маҳсулотлари эҳсон қилинди.
Муборак Рамазон ҳайити арафасида Бувайда туманидаги «Ҳусан қори» масжиди мутасаддилари ҳомийлар иштирокида Ўрта Қўнғирот маҳалласида яшовчи 22 та оилага нақд пул ҳамда озиқ-овқат маҳсулотлари туҳфа қилдилар.
Шунингдек, Фарғона тумани «Мулла Мирзажон» масжиди имом-хатиби Бахтиёржон Акбаров бошчилигидаги саховатпешалар ҳам туманнинг Каптархона, Меҳнатобод, Ёйилма, Бўстонобод ва Гулистон маҳалласида истиқомат қилувчи ногиронлиги бўлган ҳамда ёрдамга муҳтож оилалар ҳолидан хабар олиб, уларга озиқ-овқат жамланмаси тарқатилди.
Бундан ташқари, Марғилон шаҳрининг «Галатой» ва «Гумбаз» масжиди масъуллари томонидан Рамазон ҳайити арафаси ёлғиз кексалар ва «Меҳр» операциясида ватанга қайтган оилалар ҳолидан хабар олиниб, уларга ҳам моддий ёрдам кўрсатилди.
Аллоҳ таоло қўли очиқ халқимиз томонидан қилинаётган барча эҳсонларни қабул қилсин!
