Муборак Рамазон ойининг файзли кунларида хайрли ишга қўл урилди. Қува туманида жойлашган “Қўшкечик” масжидининг янги биноси қурилишига ғишт қўйилди. Маросимда Фарғона вилояти бош имом-хатиби Убайдуллоҳ домла Абдуллаев ҳамда кенг жамоатчилик вакиллари иштирок этди.
Янги лойиҳага кўра миллий ҳунармандчилик намуналарига асосланган хонақоҳ қад ростлайди. Шунингдек, йигирма ўринли таҳоратхона ҳамда маъмурият хоналари – имом-хатиб, имом ноиби ва қоровулхоналар ҳам замонавий архитектура талаблари асосида бунёд этилади.
Маросимда вилоят бош имом-хатиби Убайдуллоҳ домла Абдуллаев ушбу хайрли ишни барокатли кунларда бошланиши ҳам бежиз эмаслигини қайд этиб, масжиднинг янги биноси тез фурсатда гўзал ҳолатда битишини сўраб дуо қилдилар. Аллоҳнинг байтини ободонлаштиришда ўз ҳиссасини қўшаётганлар ҳаққига ҳам ажру савоблар тилаб дуога қўл очилди.
