Аллоҳ таоло бандаларига берган энг улуғ неъмати фарзанд неъматидир. Ҳа, фарзанд Аллоҳ таолонинг санаб адоғига етиб бўлмайдиган неъматидир. У дунё ҳаётининг зийнатидир.
Аллоҳ таоло айтадики: «Мол-мулк, фарзандлар дунё ҳаётининг зийнатидир…» («Каҳф» сураси, 46-оят).
Фарзанд қалб райҳони, гулидир. Ёшлик чоғларида уларни эркалаб кўнглимиз ҳузур қилади. Катта бўлганларида эса ёрдамларидан баҳраманд бўламиз. Вафот этганимиздан кейин уларнинг сайъ-ҳаракатлари туфайли номаи аъмолимиздаги савобларимиз зиёда бўлади.
Ўтмишда ўтган улуғлардан баъзилари бир-бирларига: “…Болангни икром қил ва унинг одобини гўзал қил” дея эслатишар экан. Бу эса, болаларга ҳурмат-эҳтиром ила муомала қилиш ва уларга гўзал одоб беришга чорлашдир. Аниқроқ айтганда, каттами кичик, эркакми аёл, ким бўлишидан қатъий назар Исломда инсон ва унинг қадр-қимматига бўлган эътиборнинг бир кўринишидир.
Она диёримизда ҳам инсонга бўлган эътибор, хусусан, фарзандларимизни таълим-тарбияли қилиб ўстиришга, уларни ватанга садоқат, мустаҳкам иймон ва эътиқод соҳиби қилиб камол топтириш ҳар қачонгидан ҳам кўра долзарб вазифага айланган. Уларнинг соғлом, илм-маърифатли ҳамда дину диёнатли бўлиб улғайишлари учун зарур шароитлар яратиб берилмоқда.
Юртимизда 1 июнь – “Халқаро болаларни ҳимоя қилиш куни” куни сифатида кенг нишонланади. Бу гал ҳам мазкур сана муносабати билан жойларда турли тадбирлар ўтказилиб, болажонларга қувонч ва меҳр улашилди. Ана шундай тадбирлардан бири Фарғона шаҳри марказидаги “Palma” мажмуасида ташкил этилиб, унда вилоят ҳокимлиги ва қатор мутасадди ташкилот вакиллари ҳамда имконияти чекланган, ногиронлиги бўлган болалар иштирок этди.
Мазкур тадбирга Ўзбекистон мусулмонлари идораси Фарғона вилояти вакиллиги, вилоят бош имом-хатиби Салимжон қори Қодиров бошчилигидаги қатор имом-хатиблар ҳам ташриф буюриб, тадбир иштирокчилари – болажонларни кириб келаётган муборак “Рамазон ҳайити” байрами ҳамда 1 июнь – “Халқаро болаларни ҳимоя қилиш куни” куни билан муборакбод этдилар. Тадбирда қатнашган 120 нафардан зиёд кам таъминланган, имконияти чекланган ёҳуд ногиронлиги бўлган болажонларга моддий ёрдам кўрсатилиб, уларга кийим-кечаклар тарқатилди.
“Фарзандлар – жаннат райҳонларидир”. Шундай экан, ҳеч бир ота-онага фарзанд доғини кўрсатмасин! Ҳаётимиз фарзандлар қувончи ва кулгуси ила бахтга тўлсин!
Раҳматилло ЖАЛИЛОВ,
Қўштепа тумани “Исмоил Бухорий” масжиди имом-хатиби
fargonaziyo.uz сайти ходими
