Дарҳақиқат, фарзанд тарбияси – катта масъулият. Бу борада ота-оналар ўрни беқиёс эканини айтиш ўринли. Зеро, халқона тил билан айтганда, эркак кишига кўчанинг одами сифатида қаралиб, оила эҳтиёжини таъминлаш, аҳли аёлига ҳалолдан едириш, кийдириш учун меҳнат қилиб, тер тўкади. Эркакнинг топганини ўрнига сарфлаш, хонадон покизалигини саклаш, фарзандларни яхши тарбиялаш орқали оиладаги маънавий муҳитни тўкис қилиш аёл зиммасига тушади.
Она ва бола ўртасида руҳий ҳамда биологик жиҳатдан боғланиш мустаҳкам ҳисобланиб, бундан тарбия жараёнида таъсирчан омил сифатида фойдаланиш мақсадга мувофиқдир. Бироқ, барча оналар ҳам ана шу тарбиявий таъсирдан тўлиқ фойдаланила олинмаётганини айтиш ўринлидир.
Ҳозирги кунга келиб аёллар ўртасида «гап ейиш» яхшигина урфга айланди. Бундан ташқари, интернетдаги ижтимоий тармоқларда уй бекаларининг фаоллашиб бораётгани ҳам сир эмас. Эътиборли жиҳати шундаки, оналар учун энди болалар тарбияси эмас, турли ўтиришлар, интернет мулоқотлари муҳим бўлиб қолаётгандек гўё. Бу каби ишлар замонавийлик белгисидек кўринсада, аслида оналарнинг болалар ва уларнинг тарбиясидан узоқлашувидан дарак бермоқда. Шу тарзда айрим оилаларда ота-оналар ва фарзандлар ўртасида мулоқотнинг камлиги, ўзаро эътиборнинг пасайиши, муносабатларнинг ёмонлашуви натижасида асабий танглик, ҳатто ўз жонига қасд қилиш каби оғир ҳолатлар ҳам кузатилмокда.
Расулуллоҳ соллаллоҳу алайҳи ва саллам: «Фарзандларингизни ҳурматланг ва уларнинг одобини гўзал қилинг», деб таъкидлаганлар. Зеро, икки дунёмиз обод бўлиши фарзандларимиз камолига боғлиқ. Шундай экан, бу йўлда лоқайдлик қилмасликка, ҳар дамгидан ҳам эътиборли бўлишга мажбурмиз.
Бизнинг давр фарзанд тарбиясига ҳар қачонгидан ҳам жиддий ёндашишни талаб қилади. Вақтимизни «ўтириш», «гап ейиш»ларга сарфламай, фарзандларимиз ёнида кўпроқ бўлайлик, уларнинг ўқишлари, орзу-мақсадлари билан қизиқиб, ҳақларига хайрли дуолар қилайлик. Шунда улар телефон, интернетдан «дўст» қидирмай, кўнгилларини бизга очадилар.
Оилада отанинг бошқарувчилик ўрни аниқ бўлса, она ўзлигини англаган ҳолда эрига итоатли бўлса, болалар эътибордан четда қолмайди, жиноятчилик кўчасига кирмайди, адашган оқимлар таъсирига тушмайди. Оила парокандалигининг олди олинади.
Гулруҳ АШУРОВА,
Данғара тумани бош отинойиси
