Аллоҳ таоло бандаларига ўта меҳрибон Зот. Бу меҳрнинг ўлчовига ақллар лол қолади. У ҳаёллар ва тасаввурларга сиғмайдиган даражада олийдир, кенг ва туганмасдир. Ҳақ таоло Қуръони каримда бу олий сифатини Ўзи таъкидлаб: “Аллоҳ бандаларига меҳрибон Зотдир”, – дейди (Оли Имрон сураси, 30-оят). Ҳар куни кўп марта, такрор-такрор айтадиганимиз “Бисмиллаҳ…”да Аллоҳ таолони меҳрибонлик сифатини ёдга оламиз.
Алҳамдулиллаҳ, Роббимиз бандаларининг қалбига ҳам меҳр-шафқат, ҳиммат ва ачиниш каби лазиз фазилатларни жойлаб қўйган. Бандалари ичида афзали бўлмиш Пайғамбаримиз Муҳаммад алайҳиссалом, шубҳасиз, башариятнинг энг меҳрибон шахсиятидир. У зот бу борада оламларга раҳмат ва гўзал ўрнакдирлар.
Бу ҳақда Аллоҳ таоло бундай дейди: “Батаҳқиқ, сизларга ўзингиздан бўлган, машаққат чекишингиз унинг учун оғир бўлган, сизни ардоқловчи, мўминларга мушфиқ, меҳрибон Расул келди” (Тавба сураси, 128-оят). Севимли пайғамбаримиз соллаллоҳу алайҳи ва салламнинг кўп улуғ сифатлари қаторида меҳрибон Расул эканликлари ҳам алоҳида баён этилмоқда бу оятда.
У зот алайҳиссаломнинг сийратларини ва суннатларини ўрганган ҳар қандай киши – у хоҳ мусулмон бўлсин, хоҳ ғайридин бўлсин – бунга амин бўлади, ушбу ҳақиқат олдида бош эгади. Ҳадисларни ўрганганимизда нафақат Пайғамбаримиз алайҳиссаломнинг меҳрибонлигини кўрамиз, балки У зот нима иш қилсак, меҳрибонлик сифатини ошишини ўргатаётганига ҳам гувоҳ бўламиз. “Фалон ишни қилинг, орангизда меҳр уйғонади, фалон ишни қилинг, меҳр кўрсатган бўласиз” каби жумлаларни кўп учратамиз.
Атрофимиздаги меҳрибонлар эса ҳаётимиздан миннатдор ва мамнун ҳолда яшашимизга сабабчи бўладилар. Онамизнинг меҳрини таърифлашга энг яхши сўзларни топа оламизми? Қаттиққўллиги ҳам меҳридан дарак берувчи отамиз ҳақида илиқ гап айтишга қодирмизми? Акамиз, опамиз ва бошқа қанча яқинларимиз… Аллоҳ бизни ўз ҳолимизга ташлаб қўймай меҳрибонликдек гўзал сифатни қалбимизга жо айлади. У шундай неъматки, жонимизга жон, чанқоғимизга оби ҳаётдир. У туфайли кўнгиллар таскин топади. Кўзларга қувонч югуради.
“Давлатимиз томонидан муборак Рамазон ойида яна бир хайрли, улкан аҳамиятга эга “Меҳр” инсонпарварлик операцияси амалга оширилди. Ўзбекистон Республикаси Президенти Шавкат Мирзиёевнинг топшириғига биноан, 156 нафар ватандошимиз, асосан аёллар ва болалар Яқин Шарқдаги қуролли можаролар ҳудудидан юртимизга қайтарилди. Улар 30 май куни махсус авиарейсда Тошкент шаҳрига олиб келинди”.
Бу шундай сурурли хабарки, ичингда шукр ва миннатдорлик туйғуси жўш уради. Банда хатодан ҳоли эмас, айниқса, бу хато алдов оқибатида бўлса. Кечиримли бўлиш, қўл остидагиларга мурувват кўрсатиш ишбошиларга ярашадиган фазилатлардандир.
Бу шундай таҳсинга сазовор иш бўлдики, эътирофини хорижнинг нуфузли кишиларидан ҳам эшитмоқдамиз.
ЮНИСЕФнинг Ўзбекистондаги ваколатхонасининг раҳбари Саша Грауман Суриядан болаларнинг Ўзбекистонга қайтарилиши бўйича берган баёнотида ташкилот Ўзбекистон Республикасининг Суриядан Ўзбекистон фуқаролари бўлган болаларни ва Ўзбекистон фуқароларининг Сурия давлатида туғилган болаларини Ўзбекистонга олиб келганини қўллаб-қувватлайди.
Умуман олганда, бу хайрли иш ҳаммамизни хурсанд қилди. Меҳр қанчалар мунаввар ва муборак туйғу эканига яна бир бор гувоҳ бўлдик. Аллоҳ таоло меҳрибонларни паноҳида асрасин! Бу туйғу фазилат ва қадрият ўлароқ қалбимиздан янада мустаҳкам жой олишини Ўзи таъминлаган бўлсин!
Муҳаммадолим ИНОМЖОНОВ,
Марғилон шаҳар “Нўмон” масжиди имом-хатиби
