Жорий йилнинг 5 сентябрь куни Ўзбекистон мусулмонлари идораси Фарғона вилояти вакиллиги ташаббуси билан отинойилар ўртасида “Заковат” интеллектуал ўйини ташкил этилди. Тадбир республика “Заковат” клубининг вилоят бўлими билан ҳамкорликда ўтказилиб, иштирокчиларда катта қизиқиш уйғотди.
Беллашув саволлари миллий қадриятларимиз ва севимли асарларимиз мазмун-моҳиятидан олингани иштирокчиларнинг билим ва дунёқарашини янада бойитди. Отинойилар барча саволларга завқ билан жавоб қайтариб, мусобақа жараёнида кўтаринки руҳда қатнашдилар.
Мазкур танлов Республикамиз мустақиллигининг 34 йиллиги муносабати билан “Ватан учун, миллат учун, халқ учун” шиори остида ўтказилаётган маънавий-маърифий дастурларнинг мантиқий давоми бўлди.
Беллашув якунига кўра, барча саволларга тўғри ва тезкор жавоб бериб, энг юқори балл тўплаган Ёзёвон тумани жамоаси 1-даражали диплом билан тақдирланди. Иккинчи ўринга Қўқон шаҳри жамоаси, учинчи ўринга эса Данғара тумани жамоаси сазовор бўлди.
Тадбир иштирокчилари қайд этганидек, бугун қўлга киритилган билим ва тажрибалар отинойиларни янада изланишга, ўз устида тинимсиз ишлашга ҳамда интеллектуал салоҳиятларини бойитишга ундайди. Зеро, отинойи – диний ва дунёвий билимларни эгаллаган, жамият тараққиётига муносиб ҳисса қўшадиган маърифатли аёлдир.
***
Joriy yilning 5 sentyabr kuni O‘zbekiston musulmonlari idorasi Farg‘ona viloyati vakilligi tashabbusi bilan otinoyilar o‘rtasida “Zakovat” intellektual o‘yini tashkil etildi. Tadbir respublika “Zakovat” klubining viloyat bo‘limi bilan hamkorlikda o‘tkazilib, ishtirokchilarda katta qiziqish uyg‘otdi.
Bellashuv savollari milliy qadriyatlarimiz va sevimli asarlarimiz mazmun-mohiyatidan olingani ishtirokchilarning bilim va dunyoqarashini yanada boyitdi. Otinoyilar barcha savollarga zavq bilan javob qaytarib, musobaqa jarayonida ko‘tarinki ruhda qatnashdilar.
Mazkur tanlov Respublikamiz mustaqilligining 34 yilligi munosabati bilan “Vatan uchun, millat uchun, xalq uchun” shiori ostida o‘tkazilayotgan ma’naviy-ma’rifiy dasturlarning mantiqiy davomi bo‘ldi.
Bellashuv yakuniga ko‘ra, barcha savollarga to‘g‘ri va tezkor javob berib, eng yuqori ball to‘plagan Yozyovon tumani jamoasi 1-darajali diplom bilan taqdirlandi. Ikkinchi o‘ringa Qo‘qon shahri jamoasi, uchinchi o‘ringa esa Dang‘ara tumani jamoasi sazovor bo‘ldi.
Tadbir ishtirokchilari qayd etganidek, bugun qo‘lga kiritilgan bilim va tajribalar otinoyilarni yanada izlanishga, o‘z ustida tinimsiz ishlashga hamda intellektual salohiyatlarini boyitishga undaydi. Zero, otinoyi – diniy va dunyoviy bilimlarni egallagan, jamiyat taraqqiyotiga munosib hissa qo‘shadigan ma’rifatli ayoldir.
