Бугун диёримиз масжидларида мўмин-мусулмонлар учун қулай шарт-шароитлар, янги микониятлар яратилмоқда. Масжидлар янги қиёфа кашф этиб, заминимиз узра ўз нурини таратмоқда. Тан олиш керак, ҳатто уйимизда бўлмаган айрим имкониятлар масжидларимизда мавжуд. Бунинг учун Роббимизга қанча шукр қилсак оз, албатта.
Ҳозирда Фарғона вилоятида 200 та масжид фаолият олиб бораётган бўлса, уларнинг аксари бугунги кун талабларига жавоб беради. Яна айримларида ана шундай қулайлик ва янги имкониятларни ҳозирлаш мақсадида қурилиш-таъмирлаш ишлари ҳам олиб борилмоқда. Фарғона шаҳридаги «Муҳаммад авлиё» масжиди ҳам шулар жумласидан.
Масжид дастлаб ҳашар йўли билан қурилган, ёзда салқинлатиш, қиш кунлари эса иситиш қийинчилик туғдирган. Масжид бинолари ҳам мустаҳкамлигини йўқотган. Шу каби сабаблар билан масжидни қайта қуриш ишлари бошланди.
Бугун, «Муҳаммад авлиё» масжидининг янги хонақоҳига ғишт қўйиш маросими бўлиб ўтди. Маросимда вилоят бош имом-хатиби Убайдуллоҳ домла Абдуллаев, шаҳар имом-хатиблари ҳамда бир гуруҳ нуронийлар иштирок этишди. Аллоҳдан Ўзининг байтини хайрли бўлиши, келажакда асрлар давомида мўмин-мусулмонларга хизмат қилишини тилаб, масжид хонақоҳига илк ғишт қўйилди.
Масжиднинг янги лойиҳасини ишлаб чиқишда миллий ва Hi-Tech услубидан фойдаланилган. Шунингдек, бино ва иншоотларнинг мустаҳкамлиги, иссиқ кунларда салқин бўлиши, қиш пайтларида эса иссиқ бўлишига эътибор қаратилган. Аввал масжидда 1000-1200 нафар намозхон ибодат қилган бўлса, янги масжидда 5000 нафардан зиёд намозхонлар бир вақтнинг ўзида ибодат қилишлари учун шароит яратиш кўзда тутилган.
Аллоҳ таоло ушбу байтини хайрли бўлиб қад кўтаришида Ўзи мададкор бўлсин!
