«16 ноябрь – Халқаро бағрикенглик куни» муносабати жорий йилнинг 15 ноябрь куни пойтахтимиздаги «Wyndham Tashkent» меҳмонхонасида бир гуруҳ ҳамюртларимиз «Диний бағрикенглик» кўкрак нишони билан тақдирландилар.
Тадбирга турли вазирлик ва идоралар, жамоат ташкилотлари ва диний конфессия вакиллари, миллий маданий марказлар фаоллари, юртимизда миллатлараро дўстлик ва диний бағрикенглик ришталарини мустаҳкамлашга муносиб ҳисса қўшаётган ҳамюртларимиз ҳамда ОАВ вакиллари таклиф этилди.
Дин ишлари бўйича қўмита раиси Содиқ Тошбоев юксак мукофотга сазовор бўлганларни самимий муборакбод этиб, бугун юртимиз равнақи йўлида фидокорона меҳнат қилаётган ҳамюртларимизга катта муваффақиятлар тилади ва юксак мукофотларни ўз эгаларига топширди.
Жумладан, Ўзбекистон мусулмонлари идораси Фахрийлар кенгаши аъзолари Абдуқаҳҳор Ғаффоров (Шоший), Раҳматуллоҳ қори Обидов, Фозилжон домла Убайдуллаев, Диний идора бўлим мудирлари Комилжон Бурҳонов, Шавкат Ҳамдамов, Фатво маркази бош мутахассиси Саиджамол домла Масайитов, Тошкент ислом институти проректори Соатмурот домла Примов, “Кўкалдош” мадрасаси бўлим бошлиғи Абдувоси Ғаниев, Тошкент шаҳри Олмазор тумани бош имом-хатиби Абдуллоҳ домла Юлдашев, “Ҳадичаи Кубро” билим юрти директори Марям Абдуллаева ва Тошкент шаҳар бош отинойиси Зулайҳо Соатова ана шундай эътибор ва эҳтиромга сазовор бўлишди.
Маълумот учун, Вазирлар Маҳкамасининг 2023 йил 25-сентабрдаги «Диний бағрикенглик» кўкрак нишонини таъсис этиш тўғрисида»ги қарорига кўра, ушбу кўкрак-нишони билан диний-маърифий соҳадаги ислоҳотларни тарғиб этиш, фуқаролар эътиқод эркинлигини таъминлаш, динлараро ҳамжиҳатликни мустаҳкамлаш ва маънавий муҳит барқарорлигини сақлашдаги ибратли ишлари учун етук уламолар, атоқли арбоблар, диний соҳа раҳбарлари, халқаро ташкилотлар вакиллари ҳамда хорижий олимлар тақдирланиши белгиланган.
Ушбу тантанали тадбирда сўзга чиққанлар томонидан юртимизда давлатимиз раҳбари томонидан диний-маърифий соҳада амалга оширилаётган ишлар натижасида фуқароларнинг виждон эркинлиги, дин ва миллатлараро тотувлик таъминланаётгани, мазкур кўкрак нишонининг таъсис этилгани диний соҳага бўлган юксак эътиборнинг яққол намунаси экани таъкидланди.
Мукофотланганлар ўзларининг қувончлари, дил кечинмаларини изҳор қилиб, юксак эътиборга сазовор бўлиш ҳисси уларни янада улуғвор ишларга ундашини, ёш авлодни бағрикенглик руҳида тарбиялашда янги куч-ғайрат беришига асос бўлишини таъкидладилар.
***
«16 noyabr – Xalqaro bag‘rikenglik kuni» munosabati joriy yilning 15 noyabr kuni poytaxtimizdagi «Wyndham Tashkent» mehmonxonasida bir guruh hamyurtlarimiz «Diniy bag‘rikenglik» ko‘krak nishoni bilan taqdirlandilar.
Tadbirga turli vazirlik va idoralar, jamoat tashkilotlari va diniy konfessiya vakillari, milliy madaniy markazlar faollari, yurtimizda millatlararo do‘stlik va diniy bag‘rikenglik rishtalarini mustahkamlashga munosib hissa qo‘shayotgan hamyurtlarimiz hamda OAV vakillari taklif etildi.
Din ishlari bo‘yicha qo‘mita raisi Sodiq Toshboyev yuksak mukofotga sazovor bo‘lganlarni samimiy muborakbod etib, bugun yurtimiz ravnaqi yo‘lida fidokorona mehnat qilayotgan hamyurtlarimizga katta muvaffaqiyatlar tiladi va yuksak mukofotlarni o‘z egalariga topshirdi.
Jumladan, O‘zbekiston musulmonlari idorasi Faxriylar kengashi a’zolari Abduqahhor G‘afforov (Shoshiy), Rahmatulloh qori Obidov, Foziljon domla Ubaydullayev, Diniy idora bo‘lim mudirlari Komiljon Burhonov, Shavkat Hamdamov, Fatvo markazi bosh mutaxassisi Saidjamol domla Masayitov, Toshkent islom instituti prorektori Soatmurot domla Primov, “Ko‘kaldosh” madrasasi bo‘lim boshlig‘i Abduvosi G‘aniyev, Toshkent shahri Olmazor tumani bosh imom-xatibi Abdulloh domla Yuldashev, “Hadichai Kubro” bilim yurti direktori Maryam Abdullayeva va Toshkent shahar bosh otinoyisi Zulayho Soatova ana shunday e’tibor va ehtiromga sazovor bo‘lishdi.
Ma’lumot uchun, Vazirlar Mahkamasining 2023 yil 25-sentabrdagi «Diniy bag‘rikenglik» ko‘krak nishonini ta’sis etish to‘g‘risida»gi qaroriga ko‘ra, ushbu ko‘krak-nishoni bilan diniy-ma’rifiy sohadagi islohotlarni targ‘ib etish, fuqarolar e’tiqod erkinligini ta’minlash, dinlararo hamjihatlikni mustahkamlash va ma’naviy muhit barqarorligini saqlashdagi ibratli ishlari uchun yetuk ulamolar, atoqli arboblar, diniy soha rahbarlari, xalqaro tashkilotlar vakillari hamda xorijiy olimlar taqdirlanishi belgilangan.
Ushbu tantanali tadbirda so‘zga chiqqanlar tomonidan yurtimizda davlatimiz rahbari tomonidan diniy-ma’rifiy sohada amalga oshirilayotgan ishlar natijasida fuqarolarning vijdon erkinligi, din va millatlararo totuvlik ta’minlanayotgani, mazkur ko‘krak nishonining ta’sis etilgani diniy sohaga bo‘lgan yuksak e’tiborning yaqqol namunasi ekani ta’kidlandi.
Mukofotlanganlar o‘zlarining quvonchlari, dil kechinmalarini izhor qilib, yuksak e’tiborga sazovor bo‘lish hissi ularni yanada ulug‘vor ishlarga undashini, yosh avlodni bag‘rikenglik ruhida tarbiyalashda yangi kuch-g‘ayrat berishiga asos bo‘lishini ta’kidladilar.
