Жорий йил 7 октябрь куни Фарғона шаҳридаги «Уммул қуро» жоме масжидида тадбир бўлиб ўтди. Унда шаҳар-туман бош имом-хатиблари ҳамда “Шамсуддунхон Бобохонов” нашриёт-матбаа ижодий уйи мутасаддилари иштирок этишди.
Тадбирда “Шамсуддунхон Бобохонов” нашриёти томонидан «Ҳидоят», «Мўминалар» журнали ва «Ислом нури» газетасининг юртимиз мўмин-мусулмонлари ҳаётида тутган ўрни ҳақида сўз борди. Тадбирда сўз олган нашриёт бош муҳаррири Абдулжалил Хўжам диний-маърифий нашрларнинг бугунги фаолияти, келгусидаги режалар, 2022 йилги обуна ишларига тўхталди. Шунингдек, Ўзбекистон мусулмонлари идорасининг нашрлари халқимизга етиб боришида имом-хатиблар ҳамда отинойилар хизматини эътироф этиб, уларга ташаккур билдирди.
Ана шундай тадбир вилоят вакиллиги мажлислар залида отинойилар учун ҳам ташкил этилиб, унда «Мўминалар» журнали масъул муҳаррири Нилуфар Қўчқорова, вилоят бош отинойиси Ҳилола Комилова ҳамда бир гуруҳ отинойилар иштирок этди.
Тадбир сўнгида 2021 йил обунасини ташкил этишда фаоллик ва намуна кўрсатган имом-хатиблар ва отинойилар “Шамсуддунхон Бобохонов” нашриётининг махсус ташаккурномаси ва эсдалик совғалари билан тақдирланди.
