«Жаҳолатга қарши — маърифат» шиори остида ўтказилаётган маънавий-маърифий тадбирнинг навбатдагиси Марғилон шаҳридаги «Маданият уйи»да бўлди. Унда Фарғона вилояти бош имом-хатиби Убайдуллоҳ домла Абдуллаев қатнашиб, мулоқотга ташриф қилган аҳоли вакилларига мавъиза қилиб бердилар.
— Болалар бизнинг келажагимиз, бошлаган эзгу ишларимизнинг давомчилари, кўзимизнинг нури, қалбимиз сурури. Улар билан ҳаётимиз обод, кўнглимиз чароғон. Шу сабабли ҳам болаларимиз бахтли бўлишлари учун ҳамма нарсамизни беришга тайёрмиз.
Деҳқон мевали дарахт экар экан, унинг ҳосилидан умидвор бўлган ҳолда кўчат ўтқазади. Кейин уни парвариш қилади. Керакли озуқа билан таъминлайди, сув ва ўғитларидан тинимсиз хабар олиб туради. Энг муҳими – унга меҳр беради. Чунки ҳар бир ишда меҳр бўлмас экан, кўзланган мурод ҳосил бўлмайди. Деҳқоннинг кўчатлари кўп бўлиб, улар ичра энг муҳими фарзанддир. Шунинг учун ҳам ота-она фарзандларига доимо яхши ва гўзал ўрнак бўлишлари лозим. Барча яхши сифатларни намойиш қилиб, барча ёмон сифатлардан узоқда бўлишлари керак. Ота-она болаларига шахсий намуна кўрсатишлари билан бирга, уларга одобларни қунт билан, зерикмасдан ўргатиб боришлари зарур. Чунки ота-онанинг болаларга берадиган нарсалари ичида энг қимматлиси ва зарурийси одобдир, — дея таъкидланди.
Шунингдек, Убайдуллоҳ домла Абдуллаев йиғилганларга юртимизда диний соҳада олиб борилаётган ўзгаришлар, ҳаж-умра сафарларидаги қулайликларни сўзлаш баробарида ота-онага хизмат қилиш, бировнинг ҳаққидан қўрқиш, қўшничилик ва йўл одоблари, амалларга риё аралаштирмасдан холис Аллоҳ учун қилиш фазилати ҳақида гапириб ўтдилар.
Иштирокчилардан сўз олганларнинг фикр-мулоҳазалари тингланди, бу каби мулоқотлар келажакда ўз самарасини кўрсатиши қайд этилди.
***
«Jaholatga qarshi — ma’rifat» shiori ostida o‘tkazilayotgan ma’naviy-ma’rifiy tadbirning navbatdagisi Marg‘ilon shahridagi «Madaniyat uyi»da bo‘ldi. Unda Farg‘ona viloyati bosh imom-xatibi Ubaydulloh domla Abdullayev qatnashib, muloqotga tashrif qilgan aholi vakillariga mav’iza qilib berdilar.
— Bolalar bizning kelajagimiz, boshlagan ezgu ishlarimizning davomchilari, ko‘zimizning nuri, qalbimiz sururi. Ular bilan hayotimiz obod, ko‘nglimiz charog‘on. Shu sababli ham bolalarimiz baxtli bo‘lishlari uchun hamma narsamizni berishga tayyormiz.
Dehqon mevali daraxt ekar ekan, uning hosilidan umidvor bo‘lgan holda ko‘chat o‘tqazadi. Keyin uni parvarish qiladi. Kerakli ozuqa bilan ta’minlaydi, suv va o‘g‘itlaridan tinimsiz xabar olib turadi. Eng muhimi – unga mehr beradi. Chunki har bir ishda mehr bo‘lmas ekan, ko‘zlangan murod hosil bo‘lmaydi. Dehqonning ko‘chatlari ko‘p bo‘lib, ular ichra eng muhimi farzanddir. Shuning uchun ham ota-ona farzandlariga doimo yaxshi va go‘zal o‘rnak bo‘lishlari lozim. Barcha yaxshi sifatlarni namoyish qilib, barcha yomon sifatlardan uzoqda bo‘lishlari kerak. Ota-ona bolalariga shaxsiy namuna ko‘rsatishlari bilan birga, ularga odoblarni qunt bilan, zerikmasdan o‘rgatib borishlari zarur. Chunki ota-onaning bolalarga beradigan narsalari ichida eng qimmatlisi va zaruriysi odobdir, — deya ta’kidlandi.
Shuningdek, Ubaydulloh domla Abdullayev yig‘ilganlarga yurtimizda diniy sohada olib borilayotgan o‘zgarishlar, haj-umra safarlaridagi qulayliklarni so‘zlash barobarida ota-onaga xizmat qilish, birovning haqqidan qo‘rqish, qo‘shnichilik va yo‘l odoblari, amallarga riyo aralashtirmasdan xolis Alloh uchun qilish fazilati haqida gapirib o‘tdilar.
Ishtirokchilardan so‘z olganlarning fikr-mulohazalari tinglandi, bu kabi muloqotlar kelajakda o‘z samarasini ko‘rsatishi qayd etildi.
