Мадина шаҳридаги ибодатларини бекаму кўст адо этаётган юртдошларимиз бугун муқаддас қадамжоларга зиёрат уюштирдилар. Бу ҳақда ziyo.uz интернет нашри ўзининг ижтимоий саҳифаларида хабар бермоқда. Дастлаб Уҳуд тоғи этагида саҳобалар дафн этилган макон, Қиблатайн масжиди ҳамда Қубо масжидини бориб кўрдилар. Уларга ишчи гуруҳ аъзолари ва Саудия Арабистонидаги ҳамкор ширкат «ал-Ҳидоя» вакиллари ҳамроҳлик қилдилар. Фуқароларимиз бундай муқаддас жойларни зиёрат қилар эканлар, юртимизга тинчлик, халқимизга фаровонлик ва оилаларига бахту саодат тилаб дуои илтижолар қилмоқдалар.
«Жавҳар ар-Рашид» меҳмонхонасида истиқомат қилаётган юртдошларимиз беш вақт ибодатларини Пайғамбаримиз (а.с.)нинг масжидларида адо этмоқдалар. Расулуллоҳ (с.а.в.) муборак ҳадиси шарифларида: «Уйим билан минбарим ўртасида жаннат боғларидан бир боғ» дея марҳамат қилганлар.
Бугун ҳожиларимизга янада юқори даражада ишларни ташкил қилиш мақсадида ишчи гуруҳ ва гуруҳ бошилар иштирокида йиғилиш бўлиб ўтди. Унда сўзга чиққан Ўзбекистон мусулмонлари идораси бўлим бошлиғи Муҳаммад Назар Қаюмов тегишли тавсияларни билдириб ўтди ва Мадинадаги шарт-шароитлар бўйича тегишли кўрсатмаларни берди.
Эслатиб ўтамиз, бугун дастлабки кун келган Тошкент ва Фарғоналик зиёратчиларимиз Мадинаи мунавварадаги ўз ибодат ҳамда зиёратларини адо этиб, эрта тонгдан ташкилий равишда Маккаи мукаррама томон йўл оладилар.
