Бисмиллаҳир Роҳманир Роҳийм
Агар тутаётган рўзангизнинг савобини кўпайтиришни истангиз,
Рўза ибодатингизга руҳ киритмоқчи бўлсангиз,
унда рўзанинг суннатларига амал қилинг….
Улардан биринчиси – ҳатто бир ҳўплам сув билан бўлса ҳам саҳарлик қилиш.
Расулуллоҳ соллаллоҳу алайҳи васаллам: “Саҳарлик қилиш баракадир. Уни бир қултум сув ичиб бўлса ҳам тарк этманг. Чунки Аллоҳ ва Унинг фаришталари саҳарлик қилувчиларга салавот айтадилар”, деганлар (Имом Аҳмад ривояти).
иккинчиси – ифторликни вақти кириши билан тезлаштириш.
“Расулуллоҳ соллаллоҳу алайҳи васаллам (шом) намозини ўқимасдан аввал бир неча хўл хурмо билан, агар хурмо хўл бўлмаса, хурмо қоқиси билан, агар у ҳам бўлмаса, бир неча хўплам сув билан оғиз очар эдилар” (Абу Довуд, Имом Термизий ривояти).
учинчиси – ифторликда Расулуллоҳ соллаллоҳу алайҳи васалламнинг дуоларини қилиш.
Набий соллаллоҳу алайҳи васаллам оғзини очсалар: “Заҳабаз зомау вабталатил урууқ ва сабатал ажру, иншааллоҳ”
“Чанқоқ кетди ва томирлар ҳўлланди ва иншааллоҳ ажр собит бўлди”, деб айтардилар (Абу Довуд ривояти).
тўртинчиси – рўзадорларга ифторлик қилиб бериш.
Расулуллоҳ соллаллоҳу алайҳи васаллам: “Ким рўзадор кишига ифторлик қилиб берса, у кишига ҳам рўза тутганнинг ажридек савоб берилади. Бу билан рўзадорнинг ажридан ҳеч бир нарса кам бўлмас”, деганлар (Имом Термизий ривояти).
бешинчиси – Аллоҳнинг зикри билан машғул бўлиш.
олтинчиси – Қуръони каримни кўпроқ тиловат қилиш.
еттинчиси – дуо, садақа қилиш, яхшиликка чақириш, ёмонликлардан қайтариш, беморларни зиёрат қилиш, қавм-қариндошлар билан силаи раҳмни боғлаш.
Рамазон ғанимат ойидир. Бу ой иймонни кучайтириш, Жаннатни қўлга киритиш ҳамда дўзахдан омонда бўлиш учун имкониятдир.
Расулуллоҳ соллаллоҳу алайҳи васаллам: “Рамазон кирса-ю, сўнгра ой чиққанда гуноҳи мағфират қилинмаган кимсанинг бурни ерга ишқалансин”, деганлар (Имом Термизий ривояти).
Аллоҳ таоло бу ойнинг фазилатларидан тўлиқ баҳраманд этсин. Рамазондан гуноҳлардан покланган ҳолда чиқимизга тавфиқ берсин!
Даврон НУРМУҲАММАД
***
Bismillahir Rohmanir Rohiym
Agar tutayotgan ro‘zangizning savobini ko‘paytirishni istangiz,
Ro‘za ibodatingizga ruh kiritmoqchi bo‘lsangiz,
unda ro‘zaning sunnatlariga amal qiling….
Ulardan birinchisi – hatto bir ho‘plam suv bilan bo‘lsa ham saharlik qilish.
Rasululloh sollallohu alayhi vasallam: “Saharlik qilish barakadir. Uni bir qultum suv ichib bo‘lsa ham tark etmang. Chunki Alloh va Uning farishtalari saharlik qiluvchilarga salavot aytadilar”, deganlar (Imom Ahmad rivoyati).
ikkinchisi – iftorlikni vaqti kirishi bilan tezlashtirish.
“Rasululloh sollallohu alayhi vasallam (shom) namozini o‘qimasdan avval bir necha xo‘l xurmo bilan, agar xurmo xo‘l bo‘lmasa, xurmo qoqisi bilan, agar u ham bo‘lmasa, bir necha xo‘plam suv bilan og‘iz ochar edilar” (Abu Dovud, Imom Termiziy rivoyati).
uchinchisi – iftorlikda Rasululloh sollallohu alayhi vasallamning duolarini qilish.
Nabiy sollallohu alayhi vasallam og‘zini ochsalar: “Zahabaz zomau vabtalatil uruuq va sabatal ajru, inshaalloh”
“Chanqoq ketdi va tomirlar ho‘llandi va inshaalloh ajr sobit bo‘ldi”, deb aytardilar (Abu Dovud rivoyati).
to‘rtinchisi – ro‘zadorlarga iftorlik qilib berish.
Rasululloh sollallohu alayhi vasallam: “Kim ro‘zador kishiga iftorlik qilib bersa, u kishiga ham ro‘za tutganning ajridek savob beriladi. Bu bilan ro‘zadorning ajridan hech bir narsa kam bo‘lmas”, deganlar (Imom Termiziy rivoyati).
beshinchisi – Allohning zikri bilan mashg‘ul bo‘lish.
oltinchisi – Qur’oni karimni ko‘proq tilovat qilish.
yettinchisi – duo, sadaqa qilish, yaxshilikka chaqirish, yomonliklardan qaytarish, bemorlarni ziyorat qilish, qavm-qarindoshlar bilan silai rahmni bog‘lash.
Ramazon g‘animat oyidir. Bu oy iymonni kuchaytirish, Jannatni qo‘lga kiritish hamda do‘zaxdan omonda bo‘lish uchun imkoniyatdir.
Rasululloh sollallohu alayhi vasallam: “Ramazon kirsa-yu, so‘ngra oy chiqqanda gunohi mag‘firat qilinmagan kimsaning burni yerga ishqalansin”, deganlar (Imom Termiziy rivoyati).
Alloh taolo bu oyning fazilatlaridan to‘liq bahramand etsin. Ramazondan gunohlardan poklangan holda chiqimizga tavfiq bersin!
Davron NURMUHAMMAD
