Ҳакимлардан бири айтади: “Тўрт нарсада шукр қилдим: Аввало, Аллоҳ таоло махлуқотлардан минг хилини яратди, сўнг уларнинг ичида одамни улуғ этди ва мени ҳам одам фарзандидан қилди. Кейин эса, эркакларни хотинлардан фазилатли этди ва мени эркак қилиб яратди. Шунингдек, Исломни динларнинг афзали қилди ва мени мусулмонлар сафида қилди. Қолаверса, Муҳаммад соллаллоҳу алайҳи васаллам умматларини бошқа умматлар ичида энг яхши эканлигини англадим ва мени ҳам у зотнинг умматларидан қилди”.
Исо ибн Марям (алайҳиссалом)дан зикр қилинади. У киши бир гал ҳаворийларнинг олдига чиқдилар. Эгниларида юнгдан бўлган қаттиқ кийим ва ёпинчиқ бор эди. Сочлари эса қирилган, мўйловлари олинган, ҳатто очликдан ранглари ҳам ўзгариб, ташналикдан лаблари қуриган бир ҳолда эди. Шунда у зот: “Мен Аллоҳнинг изни билан дунё манзилини белгиладим. Эй Бани Исроил жамоаси, сиз бунга ажабланманг ҳам, фахрланманг ҳам. Дунёда саҳобаларим ва биродарларим эмасизлар. Арпа нондан, мева-сабзавотлардан еб туринг. Билингки, сизлар ҳеч қачон ўша нарсаларнинг шукрини адо қила олмайсиз. Шундай экан, бунданда улканроқ неъматларнинг шукрини қандай адо этасиз!”
Агар биз атрофга теран назар билан қарасак, ожизгина ақлимиз ила ҳатто кўз билан кўриб турган неъматларнинг айримлари ҳақида тафаккур ҳам қила олмаймиз. Биз яшаб давр ва заминда не-не неъматлар “бизнинг хизматимизга” шай бўлиб турибди. Бироқ бир савол ўйлантиради: Биз буларга шукур қила оляпмизми?
Азаматжон ЭРМАТОВ,
Учкўприк тумани “Асқар Маҳмуд пирим” масжиди имом-хатиби
