“Сизлардан бирингизга ўлим келиб: “Эй Роббим, агар мени оз муддатга (дунё ҳаётида) қолдирсанг, садақа қилиб, солиҳлардан бўлиб олар эдим” дейишидан олдин Биз сизга ризқ қилиб берган нарсадан инфоқ қилиб қолинглар” (Мунофиқун сураси, 10-оят).
Аллоҳ таоло Ўзининг буюк каломида садақа, хайри-эҳсон қилишликка кўп ўринларда таълим берган. Пайғамбаримиз алайҳиссалом ҳадиси шарифда: “Касалларингни садақа билан даволанглар”, дея марҳамат қилганлар.
Зеро, Аллоҳ таоло бандаларини бир-бирларига қилиб турган яхшиликлари сабаб бандаларининг устидаги машаққатни даф қилишлиги ушбу ҳадиси шариф орқали ҳам ўз аксини топмоқда.
Бугун, бутун дунё халқи пандемияни бошдан кечираркан, халқимиз ўз қадриятлари ҳамда дин ва иймонларига содиқ қолган ҳолда бир-бирларини ҳам моддий, ҳам маънавий қўллаб-қувватлашлари лозим. Зеро, ҳаётда қилинган яхшиликлар охиратда манфаат бериши шубҳасиз. Юқорида зикр қилинган оят ва ҳадис ҳам бунга далилдир.
Яратганга шукрлар бўлсинки, бугун барчамиз – катта-ю кичик имкон қадар яхшилик қилишга катта эътибор қаратилмоқда. Лекин бугунги синовли кунларда ҳар биримиз имкониятдан келиб чиққан ҳолда хайру саховатларимизни янада кўпайтирсак, ночорлар,, муҳтожлар ва кексалар ҳолидан хабар олиб, кўнглини кўтарсак, нур устига нур бўлади. Илоҳо, бу қилинаётган яхшиликларнинг фазилатидан Яратган Роббимиз бутун оламдан, хусусан халқимиз бошидан бу вабони кўтарсин!
Бахтиёр АКБАРОВ,
Фарғона тумани “Мулла Мирзажон” масжиди имом-хатиби
