Ўзига муқаддас ислом нисбатини берган баъзи адашган гуруҳлар бутун дунё мусулмонларини гўёки “халифалик байроғи” остида бирлаштириш шиорини илгари суриб, айрим мусулмонларни чалғитиб, уларнинг қўйнини пуч ёнғоққа тўлдириб, миллатнинг ёшларини ўз домига тортмоқдалар. Бундай қора кучлар қилаётган ёвузликлари, хунрезликлари ва бегуноҳ инсонларнинг қурбон бўлаётганини “жиҳод” деб, ўшандай хунрезлик бўлаётган жойларга боришни эса “ҳижрат” деб, ўз жонига қасд қилишни “шаҳидлик” дея ёшларимиз онгини чалғитмоқдалар. Уларнинг содда ва билимсизликларидан фойдаланиб, уларни хорижга чиқишга, жангари гуруҳларга қўшишга тарғиб қилмоқдалар. Бундай ёвуз кучларнинг макру ҳийласини тушунмай, уларнинг асл мақсадларини тушуниб етмай, юрти ва оиласини ташлаб кетиб, ўзини, қолаверса, оиласи, ота-она ва фарзандларини оғир аҳволда қолдираётганлар афсуски учраб турубди. Ҳар қандай ақллик инсон яхши биладики, ўша жойларда қурол кўтариб бир-бирини ўлдираётганларнинг ҳаммаси ҳам мусулмонман деган кишилардир. Демак ўша жойларга бораётганлар билсинки, улар мусулмонни ўлдириш учун борганлардур. Бундай улкан гуноҳга бораётган ёшларимизни жирканч йўлдан қайтариш ҳар биримизнинг мусулмонлик ва Мустақил Ўзбекистон фуқаролиги бурчимиздир.
Зеро, Абу Саид (р.а) ривоят қилинган ҳадисда Пайғамбаримиз алайҳиссалом айтганлар: “Сизлардан қайси бирингиз мункар (гуноҳ) бўлган ишни кўрса, уни қўли билан (яъни кучи билан) қайтарсин, агар (қўли билан қайтаришга) қодир бўлмаса, тили билан (яъни сўзи билан насиҳат қилиб) қайтарсин, агар унга (тили билан қайтаришга ) ҳам қодир бўлмаса дили билан (қалби билан ёмон кўриб) қайтарсин. Бу (қалбдан ёмон кўриб ожиз қолиш) иймоннинг энг заиф поғонасидир.
Буюк ватандошимиз аллома Сўфи Оллоёр раҳматуллоҳи алайҳнинг “Саботул-ожизийн” асарида бениҳоя содда, миллий оҳангда, юқори савияда битилган, улуғ бобомизнинг қалб қўридан айтилган насиҳатларига эътибор берайлик:
Кишиким бўлса мўминлиғда мавсуф,
Эрур вожиб у қулға амру-маруф.
Кўзи йўқ мўмине борур эди роҳ,
Назар қилдинг ани олдидадур чоҳ.
Хабардор этмасанг улдур, хиёнат
Қаю инсоф эрур қайси диёнат
Агар олдингда тифле бўлса ногоҳ
Ёнар ўтга тушари бўлсанг огоҳ.
Узатмас бўлсанг анга дасти алтоф
Нечук бўлғай мусулмонлиғда инсоф.
Юқорида баён қилинган ҳадис ҳақида уламоларимиз: “Қўл билан қайтариш подшоҳ (раҳбар)лар вазифаси, тил билан (нотўғрилигини исботлаб) қайтариш уламолар вазифаси, лоақал дил билан қайтариш омма инсонлар вазифасидир”, деганлар.
Исмоилжон Хамроқулов,
Қўқон шаҳар “Шайхон” масжиди имом-хатиби
