Мамлакатимизда маънавий муҳит барқарорлигини таъминлаш, ёшлар тарбияси, диний ақидапарастликнинг олдини олиш, унинг салбий оқибатлари таъсиридан асраш борасида тизимли ишлар амалга оширилмоқда.
Лекин ёш авлод таълим-тарбияси, пухта билим олиши, касб-ҳунар ўрганишларига катта эътибор қаратилаётган бир вақтда баъзи ёшларнинг турли оқимлар таъсирига тушиб қолаётганлигини асло оқлаб бўлмайди. Ёшлар ниҳолга ўхшайди, уларнинг ҳаётий фикрлари ҳали тўла шаклланиб улгурмаган бўлади. Уларни қай йўсинда парвариш этсангиз, ўшандай камол топади. У яшаётган муҳит қанчалик соғлом бўлса, у шунчалик баркамол вояга етади. Шунинг учун ҳам маҳаллаларда ҳар жиҳатдан соғлом муҳитни шакллантиришга алоҳида эътибор қаратиш зарур. Энг асосий вазифамиз ёшларни турли диний оқимларнинг жирканч ғоялари таъсиридан асрашдир.
Чунки, ҳали балоғат ёшидаги фарзандларимиз уйдан чиқиб, ён-атрофидагилар билан бевосита муносабатга киришади. Қўни-қўшни, маҳалладошлар, ўртоқларининг жамиятдаги жараёнлар ҳақидаги фикрлари уларга ўз таъсирини ўтказиши табиий.
Бундан ташқари, ёшларни оммавий маданият таъсирига тушиб қолишларининг олдини олишда уларни фан ва спорт тўгаракларига жалб қилиш масаласига ҳам алоҳида эътибор қаратиш зарур. Бу каби саъйи-ҳаракатлар, албатта, юртимиз эртаси бўлган ёшларнинг жисмонан соғлом, маънан етук ва билимдон бўлиб улғайишларида муҳим аҳамият касб этади.
Шундай бўлсада, баъзи ёшларимиз шукур қилиш ўрнига ноқонуний оқимлар аъзоларига айланиб қоляпти. Бунинг оқибатида нохуш ҳолатлар содир бўляпти. Тинч ва осойишта юртни ота-она, қавм-қариндошларини ташлаб нотинч ва уруш бўлаётган юртларга кетиб қолиш ҳолатларини ҳам кузатяпмиз. Соф ислом динининг ахлоқ-одобларига риоя қилиб яшамай, балки оқим аъзоларининг пуч ваъдаларига ишониб уларга хос бўлган тинчликни кўролмайдиган, шариатга зид бўлган, ҳасад, бахил, зўравонлик, ношукурлик каби сифатлар билан яшаяптилар. Энг ачинарлиси мана шу берилган умрни бефойда бўлган ишлар билан ўтказиб умрларини хазон қиляптилар.ваҳоланки инсон қиёмат куни умрини ҳар лахзаси учун сўралади. Бу ҳақда Пайғамбаримиз а.с айтадилар: “Банда қиёмат кунида тўрт нарса ҳақида – ёшлигини нима билан ўтказганлиги, умрини қандай ўтказганлиги, илмини қандай сарфлаганлигини, мол-мулкни қаерга сарфлагани ҳақида сўралмагунча бир қадам ҳам силжимайди”, деганлар. Албатта ёшларни ахлоқ-одобли қилиб тарбиялаш ва келажак учун қайғуриш сизу бизнинг вазифамиздир.
Асқаржон Толибжонов,
Данғара тумани “Орзиқул бува” масжиди имом-хатиби.
