Аллоҳ инсонни азизу мукаррам қилди. Бир-бирига меҳр-оқибат, силаи раҳм, қийинчиликда ёрдам бериш, биродарлик каби улуғ фазилатларни ато этди. Буларнинг барчасини Аллоҳнинг бандасига берган неъматлардир.
Ҳозирда устимизда турган синовли вазиятда қанча саховатли инсонлар томонидан пандемия туфайли қийналган оилаларга ёрдам берилганлиги буни исботидир. Ўзбек халқини уруш давридаги кўрсатган матонати ҳам таҳсинга сазовор. Чунки халқимиз етим болаларни миллати, дини ва ижтимоий келиб чиқишидан қатъий назар бағрига олганини эслаб кўринг. Бундай мисолларни кўплаб келтириш мумкин. Биз ўз халқимизни муносиб фарзанди бўлиш учун қўлдан келганича ҳаракат қилмоғимиз лозим. Халқимиз орасидан етишиб чиққан Амир Темур, Улуғбек, Беруний, Навоий, Муҳаммад Исмоил Бухорий, Абу Али ибн Сино ва яна кўплаб етук инсонларнинг авлоди эканлимизни ёддан чиқармаслигимиз лозим.
Японларда одатда уйларини ёғочдан қуришади, бир япон биринчи уйини қурганига йигирма йил ўтиб иккинчи уйини қуради. Орадан анча йиллар ўтиб эски уйини бузган япон бир калтакесак иккинчи уйнинг девори орасида думидан миқланиб қолганини кўриб, шунча йиллардан бери бу калтакесак нима билан қорнини тўқлади экан, деб кузата бошлабди. Бир неча соатдан сўнг иккинчи калтакесак оғзида овқат олиб келиб миқланган калтакесакни овқатлантирганини кўриб ҳайрон қолиб: “Наҳотки, биз инсонлар шу мавжудотчалик эмасмизми?” дея ўйга толади. Биродарининг бошига оғир иш, машаққат тушсаю, имкони бўла туриб ёрдам кўрсатмаган мўмин ҳақиқий мўминми?
Азизлар! Бу кунлар ҳам ғанимат, яъни бу кунларда қилинган яхшиликлар бошқалар кунлардагига нисбатан савоби улкандир. Пайғамбаримиз алайҳиссалом: “Кишиларнинг яхшиси, бошқаларга манфаати етадиганидир” дея марҳамат қилганлар. Шундай экан, бир-бирларимиздан яхшиликларимизни аямайлик!
Муҳаммадрасул ЖАМОЛОВ,
Фарғона тумани “Тўрахон ҳожи” масжиди имом-хатиби
