Бугун сабр ва бардошимиз синалаётган жонажон юртимизга муборак Рамазон ойи кириб келмокда. Рамазон ойи бутун мусулмон олами учун тоат ибодат, сахийлик, раҳмат ва барака мавсуми ҳисобланади. Мана шундай муборак ибодатни бажариш бахтига мушарраф қилган Аллоҳга ҳамду санолар бўлсин! Расуллоҳ саллоллоҳу алайҳивассалам саҳобаларини ҳам Рамазон ойи учун тайёргарлик кўришга ундар ва бу ишни, бу ой рўзасининг хусусиятлари, унга бериладиган улкан савоблар ҳақидаги ҳадислар билан амалга оширар эдилар. Ҳадиси шарифларда пайғамбаримиз (саллоллоҳи алайҳи вассалам): “Агар Рамазон ойи кириб келса, осмон эшиклари очилиб, жаҳаннам эшиклари ёпилади ва шайтонлар кишанланади”, дея марҳамат қилганлар.
Рамазон ойи қалбимиз ва руҳимизни поклайдиган, бир-биримизга меҳр-оқибат, мурувват кўрсатадиган ойдир. Сир эмаски, ҳозирда короновирус пандемияси сабабли чекловлар жорий қилинган. Албатта, бу кўрилаётган чора-тадбирлар ҳалқимиз ва ҳар биримизни соғлиғимизни сақлашга қаратилгани барчамизга маълумдир. Муҳтарам юртбошимизнинг “Муборак Рамазон ойини муносиб тарзда ўтказиш тўғрисида”ги қарорлари, Ўзбекистон мусулмонлари идораси Уламолар кенгашининг баёноти эълон қилинди. Ҳозирги вазиятдан келиб чиқиб, Фатвога биноан карантин даврида жамоавий ифторликлар уюштирилмаслиги, таровеҳ намозларини уйда ўқишлик, саховатпеша инсонларнинг закот, фидя, фитр садақаларини “Вақф” ҳайрия жамоат фонди ва унинг ҳудудий бўлимлари ҳисоб рақамига ёки хомийлик хайрияларини мувофиқлаштириш марказларига топшириш тавсия этилади. Ҳозирги синовли даврда қилинадиган хайр-эҳсонлар, албатта, ўз эгасига Аллоҳ тарафидан бериладиган ажрларни кўпайишига сабаб бўлади. Ҳар биримиз бу ойнинг буюк фазилатларидан умидвор ҳолда бутун аъзоларимизни гуноҳлардан асраб, буюрилган тартиб-интизомга риоя қилиб, иш боши ва соҳа мутахассисларига итоат билан карантин вақтида уйда қолишимиз барчамиз учун зарурдир.
Рамазон ойида барча мўмин-мусулмонлар томонидан амалга ошириладиган ибодатлар, дуолар хайр-саховатлар ҳаққи ҳурмати Аллоҳ юртимизга тинчлик омонлик, ҳотиржамлик, баракот ато этсин!
Рамазон ойида чин маънода ҳам руҳан, ҳам жисман покланиш бахти барчамизга насиб этсин! Рамазонда уйда қолинг!
Ҳилолахон КОМИЛОВА,
Фарғона вилояти бош имом-хатибининг
хотин-қизлар масалалари бўйича ёрдамчиси
