Аллоҳ таоло Ўз каломида ота-оналарга оқ бўлиш нақадар катта гуноҳ эканини билдириб, улар бошқа дин вакили бўлсалар ҳам яхши муомалада бўлишни буюриб дейди:
…وَصَاحِبْهُمَا فِي الدُّنْيَا مَعْرُوفًا وَاتَّبِعْ سَبِيلَ مَنْ أَنَابَ إِلَيَّ ثُمَّ إِلَيَّ مَرْجِعُكُمْ فَأُنَبِّئُكُمْ بِمَا كُنْتُمْ تَعْمَلُونَ
“…Уларга (гарчи кофир бўлсалар-да,) дунёда яхши муомалада бўлгин ва ўзинг Менга тавба қилган кишиларнинг йўлига эргашгин! Сўнгра (яъни қиёмат кунида) қайтиш Менинг ҳузуримгадир, бас, сизларга (ўшанда) қилиб ўтган амалларингизнинг хабарини берурман” (Луқмон сураси, 16-оят).
Ота-онага оқ бўлишдан кўра каттароқ гуноҳ йўқ. Набий соллаллоҳу алайҳи васаллам дедилар: «Ким ота-онасига оқ бўлган ҳолда ўлса, жаннатнинг ҳидини ҳам ҳидламайди”.
Оқпадарга айтингки: «Хоҳлаганингча тоат қилавер, барибир, сенга ажр-савоб тегмайди. Аллоҳнинг ризоси ота-онанинг ризосидадир ва Унинг ғазаби икковларининг ғазабидадир. Ким ота-онасига оқ бўлса, албатта Аллоҳга осий бўлибди. Қабр азобининг энг қаттиғи оқпадаргадир. Дўзахнинг энг чуқур жойи уч тоифага: мушрикка, қўшниси билан зино қилувчига ва ота-онасига оқ бўлган кишигадир. Оқпадар ва мунофиқ дафн қилинса, дўзахнинг энг паст, энг чуқур ерига дафн қилинибди! Агар оқпадар «Ё Раббим!» деса, «сени эшитмайман, сенга ижобат қилиш ва саодат йўқдир!» дейди. Оқпадар гуноҳда ва азобда мушрикка шерикдир (Баҳрул маҳаббат, Имом Ғаззолий).
Афсуски, бугун баъзи ёшларимиз бироз “билимдон” бўлиб, ота-онасини менсимай қўймоқда. Уларнинг гапига қулоқ солмай, ўзи тенгқурлар ёки ижтимоий тармоқлардаги ўзи кўрмаган, танимаган номаълум шахсларга эргашиб, ота-оналарининг дилига озор бермоқда. Ҳатто: “Сиз менинг дунёга келишимга сабаб бўлгансиз холос”, дейишдан ҳам уялмаётир. Бу билан менда ҳеч қандай ҳақингиз йўқ демоқчи. Ваҳоланки, ота-оналарни ҳурмат қилиш ҳақида Қуръони каримда кўплаб оят ва пайғамбаримиз соллаллоҳу алайҳи васалламдан минглаб ҳадислар ривоят қилинган.
Айтинг-чи, қайси ота-она ўз фарзандига ёмонликни раво кўради? Ахир фарзандлари ҳақига беғараз чин кўнгилдан дуо қилувчи ким? Фақат ота-она! Меҳр тўла қалби билан оқ сут бериб, қўли билан нажосатингизни тозалаган ким? Шундай зотларнинг кўзини ёшлатиб, кимга эргашаяпсиз, эй нобакор?!… Кўзингизни каттароқ очинг!
Абдулмажид ИСАҚОВ,
Қўқон шаҳар бош имом-хатиби
