Ўзларини “Ислом динининг ислоҳчилари” деб номлаган бу тоифалар халифалик давлати барпо этиш даъвоси билан чиқиб, ақидавий илмлардан тўлиқ хабардор бўлмаган одамларни ўз тузоғига илинтиришга ҳаракат қилмоқда. Албатта сир эмаски, бу йўлда бир қанча ғўр ёшларни ҳатто катталарни ҳам бошини айлантириб, ўз ақидасини сингдиришга улгирди. Халқимизнинг муқаддас ислом динига бўлган муҳаббати ва айни пайтда етарли ақидавий билимларга эга бўлмаганидан фойдаланиб, соддадил халқимиздан баъзиларини адаштириб, уларга ўзларининг ғаразли ғояларини сингдиришга ҳаракат қилмоқда. Шу ўринда “халифалик давлати” қуриш ҳақида муқаддас динимиз кўрсатмаларига мурожаат қилсак.
Аввало Қуръони карим оятларининг биронтасида халифалик давлати қуришга буюрилмаган. Қолаверса, Пайғамбаримиз алайҳиссалом ўз ҳадиси шарифларида: “Халифалик давлати мендан кейин ўттиз йил давом этади..” деганлар. Бугунги кунга келиб халифалик давлати тузиш ғояси эса, Пайғамбаримиз алайҳиссалом кўрсатмаларига ҳам хилофдир.
XXI асрда ташкил топган айрим экстремистик ва радикал гуруҳларни ғарб ОАВлари “ислом” ва “мусулмон” номи билан ёритиб боришмоқда. Зеро, ушбу радикал гуруҳлар ҳақ ва муборак “Ла илаҳа иллаллоҳ” ва “Аллоҳу Акбар” сўзларини тил ўйинига айлантиришган ҳамда халифаликни қайтадан жорий этиш даъвосини қилишмоқда. Ваҳоланки, уларнинг шиорларини чеккага суриб қўйиб, уларнинг фикрлари, сўзлари ва амалларига эътибор қаратсак, Ислом ва диний аҳкомдан бирон нишона тополмайсиз. Бунга ҳозирда Сурия ва Ироқ давлатларида “халифалик” давлатини ташкил этганини жар солаётган “ИШИД” террористик ташкилотини яққол мисол келтириш мумкин ва ушбу террорчи ташкилот Ислом динига бўлган қарашларни чалғитувчи бир омилга айлантирган ҳамда бир ҳовуч “жиҳодчилар” ва “салафийлар” диний экстремистик оқимларининг ноқонуний диний ғоялари таъсирида вужудга келган. Кўплаб динни ниқоб қилиб олган террористик гуруҳлар ҳокимиятни қўлга киритиш учун уруш эълон қилишган. Улар динга хизмат қилишнинг асослари бўлган, нафсни тарбия қилиш, ҳалол меҳнат қилиш, оиласига тўғри тарбия бериш, уларни маърифатли қилиш, одамларни эзгу ишларга тарғиб этиб, ножўя ишлардан қайтариш йўлидан воз кечиб, дин кўрсатмаларига зид бўлган уруш йўлини тутишган.
Улар мавжуд ҳокимиятга очиқчасига қуролли қаршилик кўрсатишга имкон тополмагач, инсонлар жонига суиқасд қилиш ёки ҳукумат идораларига ҳужум уюштириш каби аянчли усуллардан фойдаланишади. Бу усуллар кўплаб бегуноҳ инсонлар, ёш болалар, аёллар ва қарияларнинг ҳаётдан кўз юмишига олиб келади. Боз устига бу ишлар оқибатида улар ўзлари кўзлаган “исломга хизмат қилиш” мақсадига эришишлари ҳам амри маҳолдир.
Ҳозир дунёда ва ислом оламида бўлаётган вазиятни эътиборга олиб ёшларимизни мазкур хавф-хатарлардан муҳофаза қилиш, диний экстремизм билан боғлиқ таҳдидларни англаб етиши ва бундан огоҳ бўлиши учун ўқув муассассалари раҳбарлари, ташкилотлар, диний ходимлар, маҳалла фуқаролари йиғинлари раислари ва профилактика нозирлари билан ҳамкорликда ёшларни илмли, дунёқараши кенг ватанпарвар шахс қилиб тайёрлашга ва бефарқликни салбий оқибатларига урғу бериш, диний экстремистик оқимлар тарафдорлари тарқатаётган ғояларнинг аслида Ислом таълимотига зид экани ва сиёсий мақсадларга йўналтирилганини аниқ далиллар билан исботлаб бериш, миллий-диний қадриятлар, аждодларимиз меросини ва ватанпарварлик ҳиссини сингдириб боришга қаратилган маънавий-маърифий тадбирларни доимий равишда ўтказиб бориш лозим.
А. Исақов,
Қўқон шаҳар “Зайнул-Обидин” масжиди имом-хатиби.
