Балоғатга етган муслима аёлга авратини тўсадиган ва тана тузилишини билинтирмай турадиган кийим кийиш фарздир. Ҳанафий мазҳабимизга кўра аёлларнинг номаҳрам эркакларга нисбатан аврати – юзи ва икки кафтидан ташқари бутун баданидир.
Маълумки, муслима аёлларга баданларини номаҳрам эркаклардан тўсиб юриш Аллоҳ томонидан буюрилгандир. Мўмина аёллар қасддан ёки бепарволик билан зийнатларини, яъни зийнат ҳисобланадиган аъзоларини кўрсатиб юришлари мутлақо мумкин эмас. Аёллар либосини истаган рангда кийиши мумкин. Бунда кийим аврат аъзоларини тўсадиган бўлиши, эркакларнинг либосига ўхшамаслиги, тор бўлиб, аёлнинг аъзоларини билдириб турмаслиги, юпқа бўлиб, ортидаги нарсани кўрсатадиган бўлмаслиги ҳамда фитнага сабаб бўлмайдиган либос бўлиши шарт қилинган. Шуҳрат кийими ёки диққат эътиборни тортадиган даражада бўлиши керак эмас.
Аёллар эркаклар кийимини кийиши ва уларга ўхшашга ҳаракат қилиши ҳам мумкин эмас. Эркак ҳам, аёл ҳам кийинишда, юриш-туришда ҳамиша ҳаёли бўлиши, иффатини асраши лозим. Бу эса гўзал исломий одоблардан саналиб, уларга амал қилиш ҳар бир мусулмондан талаб этилади. Шунингдек, аёл киши кийган кийим номаҳрам эркак кишиларнинг эътиборини ўзига жалб қиладиган ялтироқ ва яшнаб турувчи рангларда бўлмаслиги талаб этилади. Чунки, Аллоҳ таоло Қуръони каримда: “Аёллар зеб-зийнатларини кўрсатмасинлар!” дея буюрган (Нур сураси, 31-оят).
Одатда араб аёллари қора рангли кийим кийишади. Бу урф саналиб, камтарлик белгиси деб санашади. Аслида динимиз аёлларни маълум бир рангдаги кийимни кийишга мажбурламайди. Динимизда аёлларнинг либоси ёки рўмоли муайян бир рангда ёки шаклда бўлиши қатъий белгиланмаган. Айни кунларда аёл-қизлар орасида урфимизда одат бўлмаган бошдан-оёқ тим қора либос кийиш жамиятда кўпчиликни ўзига жалб этиш ҳолатлари учрамоқда. Мана шу жиҳатни ҳам доимо ёдда сақлаш керак. Ислом динида аёл-қизларнинг сатри авратда бўлиши талаб этилсада, бунда махсус рангдаги кийим кийиш шарт этиб белгиланмаган. Баъзи шарқ мамлакатлари аёлларининг қора кийим кийиши арабларнинг иқлимий ва маданий-тарихий омиллари билан боғлиқ бўлиб, бунга диний тус бериш тўғри эмас. Ҳуқуқий томондан қаралганда, кийиниш ҳар кимнинг шахсий иши бўлиб, рўмол ўраш виждон эркинлиги билан ҳам бевосита алоқадор. Аслида эса рўмол ўраш миллий-диний кийим, ибодат кийими эмас, зеро, Исломда “ибодат кийими” деган тушунча ўзи умуман йўқ. Ҳижоб – аёл учун жисмоний ва маънавий ҳимоя маъноларини англатади. Бизнинг урфимизда «ҳижоб» сўзи «рўмол» маъносида ишлатилса, баъзида «ҳижобли» ўрнига «ўранган» сўзи қўлланилади.
Олимжон Обиджонов,
Қувасой шаҳар «Ислом» масжиди имом-ноиби
