Савол: Ассалому алайкум!
— Яқинда мен бировни пулини ўғирладим, лекин озроқ қисмини жойига қўйдим, қолганини ҳам қуйиш ниятим бор. Лекин у одам жуда ҳам ичи қора одам. Ҳаммани бир-бирига ёмонлаб юради, мени ҳам бошқаларга ёмонлаб, ёмон кўрсатиб ташлаган. Лекин мен Aллоҳдан қўрқганлигим учун у пулларни жойига қўймоқчиман, у пулни олганимдан хабари йўқ. Менга қандай маслаҳат бера оласиз?
Жавоб: Ва алайкум ассалом!
— Мусулмон учун бировнинг моли ҳаром, фақат чин кўнгилдан берсагина ҳалол бўлади. Ўзганинг молини билдирмасдан олиш ўғирлик дейилади ва бу иш Исломда қўл кесишдек оғир жазо белгиланган гуноҳи кабира, яъни улкан ҳалокатга олиб борувчи гуноҳлардан ҳисобланади.
Бу борада Аллоҳ таоло бундай деган:
{وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِنَ اللَّهِ وَاللَّهُ عَزِيزٌ حَكِيمٌ}
яъни: «Ўғри эркак ва ўғри аёлнинг – қилмишларига яраша жазо ва Аллоҳдан (берилган) азоб сифатида – қўлларини кесингиз!* Аллоҳ қудрат ва ҳикмат эгасидир» (Моида сураси, 38-оят). Расулуллоҳ соллаллоҳу алайҳи васаллам ҳам бу борада мана бундай деб марҳамат қилганлар:
لا يحل مال رجل مسلم لأخيه إلا ما أعطاه بطيب نفسه
«Мусулмон кишининг моли биродарига ҳалол бўлмайди, фақат ўзи унга чин кўнгилдан билан берса ҳалолдир» (Байҳақий, 8/16533). Шунингдек, Расулуллоҳ соллаллоҳу алайҳи васалламнинг ҳажжат ал-вадоъда айтган гаплари қатъийдир:
فَإِنَّ دِمَاءَكُمْ وَأَمْوَالَكُمْ وَأَعْرَاضَكُمْ بَيْنَكُمْ حَرَامٌ
«Албатта сизларнинг қонларингиз, молларингиз ва обрўларингиз бир-бирларингизга ҳаромдир!…» (Бухорий, 1/67).
Сиз тезлик билан қолган пулларини ҳам қайтаринг. Қилган ишингизга астойдил пушаймон бўлиб тавба қилинг.
Шу ўринда бир нарсани айтиб ўтиш керакки, Исломда ёмон инсонга ҳар қандай одам ўзи истаганча жазо бериб кетавермайди. Балки буни масъул шахслар ва ташкилотларга ҳавола қилинади ва улар муносиб тарзда чорасини кўрадилар. Валлоҳу аълам.
ЎМИ Фатво ҳайъати
