Савол: Ассалому алайкум!
— Бир киши масжидда нафл намозни бошлаганда иқомат такбири айтиб юборилса, нима қилади?
Жавоб: Ва алайкум ассалом!
— Бундай ҳолатда икки ракат ўқиб, намозини тугатади ва жамоатга қўшилади. Дарҳол намоздан чиқиш намозни бузиш ҳисобланади. Бундай қилмайди, балки имомга биринчи ракатда иқтидо қилиш учун қисқа зам сура ўқиб, салавот ва дуони ҳам қисқароқ қилиб, намозини тезроқ ўқиб тугатади. Агар тўрт ракат нафл ўқишни ният қилиб бошлаган бўлса ҳам икки ракатда тугатади. Тўрт ракатга чўзмайди. Чунки намозларнинг энг ками икки ракатдир. Бир ракатли намоз йўқ. Бу ҳақида “Фатовои Оламгирия” бундай ибора келган:
“Агар намозхон нафл намозга киришгандан кейин фарз намозга такбир айтилиб қолса, бошлаган намозини икки ракат қилиб тамомлайди. Ундан кўп ўқимайди (масалан, тўрт ракат нафлга ният қилиб қўйган бўлса ҳам икки ракат билан тугатади). “Муҳити Сарахсий”да шундай келган”.
Иқомат такбири айтилгандан кейин ҳеч қандай нафл намозга киришилмайди. Такбирдан кейин суннат ва нафлларга киришиш макруҳдир. Бундан фақат, фарзга улгуриш шарти билан, бомдоднинг суннати истисно қилинган (“Бадоиъус саноиъ” китоби). Валлоҳу аълам.
ЎМИ Фатво маркази
* * *
Savol: Assalomu alaykum!
— Bir kishi masjidda nafl namozni boshlaganda iqomat takbiri aytib yuborilsa, nima qiladi?
Javob: Va alaykum assalom!
— Bunday holatda ikki rakat o‘qib, namozini tugatadi va jamoatga qo‘shiladi. Darhol namozdan chiqish namozni buzish hisoblanadi. Bunday qilmaydi, balki imomga birinchi rakatda iqtido qilish uchun qisqa zam sura o‘qib, salavot va duoni ham qisqaroq qilib, namozini tezroq o‘qib tugatadi. Agar to‘rt rakat nafl o‘qishni niyat qilib boshlagan bo‘lsa ham ikki rakatda tugatadi. To‘rt rakatga cho‘zmaydi. Chunki namozlarning eng kami ikki rakatdir. Bir rakatli namoz yo‘q. Bu haqida “Fatovoi Olamgiriya” bunday ibora kelgan:
“Agar namozxon nafl namozga kirishgandan keyin farz namozga takbir aytilib qolsa, boshlagan namozini ikki rakat qilib tamomlaydi. Undan ko‘p o‘qimaydi (masalan, to‘rt rakat naflga niyat qilib qo‘ygan bo‘lsa ham ikki rakat bilan tugatadi). “Muhiti Saraxsiy”da shunday kelgan”.
Iqomat takbiri aytilgandan keyin hech qanday nafl namozga kirishilmaydi. Takbirdan keyin sunnat va nafllarga kirishish makruhdir. Bundan faqat, farzga ulgurish sharti bilan, bomdodning sunnati istisno qilingan (“Badoi’us sanoi’” kitobi). Vallohu a’lam.
O‘MI Fatvo markazi
