Шу йил, 9 ноябрь куни Ўзбекистон делегацияси ҳамда Саудия Арабистони Ҳаж ва умра вазирлиги ўртасида “Ҳаж – 2026” мавсумини намунали ташкил этиш юзасидан мулоқот бўлиб ўтди. Унда Президент маслаҳатчиси ўринбосари Музаффар Комилов, муфтий Шайх Нуриддин Холиқназар ҳазратлари, Дин ишлари бўйича қўмита раиси Содиқжон Тошбоев, атташе Шуҳрат Амоний ҳамда Ҳаж ва умра вазири Тавфиқ бин Фавзон ар-Рабиа, Саудия элчиси Юсуф ал-Утайбий келгуси ҳаж мавсумини юқори даражада ташкил этишни муҳокама қилишди.
Учрашув аввалида муҳтарам Президентимиз ҳамда Саудия Арабистони Подшоҳи Салмон бин Абдулазиз Ол Сауд, Валиаҳд Муҳаммад бин Салмон Ол Сауд ўртасидаги кўп қиррали муносабатлар салмоқли натижа бераётгани, делегациялар алмашинуви кўпайгани ва ҳожиларга энг юқори даражадаги хизматлар кўрсатилаётгани алоҳида қайд этилди.
Музокаралар чоғида янги мавсумда ҳожилар хавфсизлигини таъминлаш мақсадида жорий этилган янги тартиб-қоидалар тўғрисида фикр-мулоҳаза алмашилди. Жумладан, тиббий талабларга қатъий риоя этиш, ҳужжатларни ўз вақтида расмийлаштириш, шартнома бандларини бажариш ва ҳаж мавсумида низом талабларига амал қилишга урғу қаратилди.
Ҳаж вазири давлатимиз Раҳбари ташаббуслари билан амалга оширилаётган ислоҳотлар, илмий-тадқиқот, бунёдкорлик ишлари, ҳаж ва умра йўналишидаги янгиланишлар ва зиёратчиларимиз тартиб-интизомини юқори баҳолади. Шунингдек, у Ўзбекистондаги Ислом цивилизацияси ва Самарқандаги Имом Бухорий мажмуасининг тантанали очилиш маросимларида иштирок этиш ниятини билдирди.
Учрашувда зиёрат туризмини ривожлантириш, ўлкамизнинг қадимий шаҳарларига саёҳатлар уюштириш, илм-фан, илмий-тадқиқот йўналишида ҳамкорлик қилиш кабиларга ҳам тўхталинди.
Мулоқот якунида томонлар қатор масалалар бўйича келишувга эришиш баробарида ўзаро эсдалик совғалари алмашдилар.
***
Shu yil, 9 noyabr kuni Oʻzbekiston delegasiyasi hamda Saudiya Arabistoni Haj va umra vazirligi oʻrtasida “Haj – 2026” mavsumini namunali tashkil etish yuzasidan muloqot boʻlib oʻtdi. Unda Prezident maslahatchisi oʻrinbosari Muzaffar Komilov, muftiy Shayx Nuriddin Xoliqnazar hazratlari, Din ishlari boʻyicha qoʻmita raisi Sodiqjon Toshboev, attashe Shuhrat Amoniy hamda Haj va umra vaziri Tavfiq bin Favzon ar-Rabia, Saudiya elchisi Yusuf al-Utaybiy kelgusi haj mavsumini yuqori darajada tashkil etishni muhokama qilishdi.
Uchrashuv avvalida muhtaram Prezidentimiz hamda Saudiya Arabistoni Podshohi Salmon bin Abdulaziz Ol Saud, Valiahd Muhammad bin Salmon Ol Saud oʻrtasidagi koʻp qirrali munosabatlar salmoqli natija berayotgani, delegasiyalar almashinuvi koʻpaygani va hojilarga eng yuqori darajadagi xizmatlar koʻrsatilayotgani alohida qayd etildi.
Muzokaralar chogʻida yangi mavsumda hojilar xavfsizligini ta’minlash maqsadida joriy etilgan yangi tartib-qoidalar toʻgʻrisida fikr-mulohaza almashildi. Jumladan, tibbiy talablarga qat’iy rioya etish, hujjatlarni oʻz vaqtida rasmiylashtirish, shartnoma bandlarini bajarish va haj mavsumida nizom talablariga amal qilishga urgʻu qaratildi.
Haj vaziri davlatimiz Rahbari tashabbuslari bilan amalga oshirilayotgan islohotlar, ilmiy-tadqiqot, bunyodkorlik ishlari, haj va umra yoʻnalishidagi yangilanishlar va ziyoratchilarimiz tartib-intizomini yuqori baholadi. Shuningdek, u Oʻzbekistondagi Islom sivilizasiyasi va Samarqandagi Imom Buxoriy majmuasining tantanali ochilish marosimlarida ishtirok etish niyatini bildirdi.
Uchrashuvda ziyorat turizmini rivojlantirish, oʻlkamizning qadimiy shaharlariga sayohatlar uyushtirish, ilm-fan, ilmiy-tadqiqot yoʻnalishida hamkorlik qilish kabilarga ham toʻxtalindi.
Muloqot yakunida tomonlar qator masalalar boʻyicha kelishuvga erishish barobarida oʻzaro esdalik sovgʻalari almashdilar.
