Фарғона вилояти вакиллигида 2024–2025 ўқув йилида диний таълим муассасаларини муваффақиятли якунлаб, соҳа фаолиятини бошлаган ёш кадрлар билан учрашув ва мулоқот ташкил этилди.
Мазкур маънавий аҳамиятга эга тадбирда вилоят бош имом-хатиби Убайдуллоҳ домла Абдуллаев, бош имом-хатиб ўринбосари Алишер домла Наимов ҳамда Бувайда тумани бош имом-хатиби Аҳмадхон домла Низомовлар иштирок этиб, ёш кадрлар билан суҳбат қурдилар.
Учрашув давомида юртимизда диний-маърифий соҳада амалга оширилаётган ислоҳотлар, имом-хатиблар учун яратилаётган имконият ва шарт-шароитлар ҳақида атрофлича маълумот берилди. Маърузачи устозлар имомликнинг улуғ шарафи ва юксак масъулияти ҳақида сўз юритиб, ёшларни ўз вазифасига сидқидилдан ёндошишга даъват этдилар. Шунингдек, улар ўз ҳаётий тажрибалари ва амалий машғулотлари билан ўртоқлашдилар.
Маълумот ўрнида айтиш жоизки, жорий йилда диний таълим муассасаларини тамомлаган 26 нафар битирувчи вилоятдаги турли масжидларга имом-хатиб ва имом-ноиби вазифаларига тайинланди. Бу эса соҳага ёш кадрларни жалб этишдаги муҳим қадамлардан бири бўлди.
Мулоқот сўнгида ёшларга уларнинг масъулиятли хизмат йўлида муваффақият ва фатҳларни Аллоҳдан сўраб дуо қилинди.
***
Farg‘ona viloyati vakilligida 2024–2025 o‘quv yilida diniy ta’lim muassasalarini muvaffaqiyatli yakunlab, soha faoliyatini boshlagan yosh kadrlar bilan uchrashuv va muloqot tashkil etildi.
Mazkur ma’naviy ahamiyatga ega tadbirda viloyat bosh imom-xatibi Ubaydulloh domla Abdullayev, bosh imom-xatib o‘rinbosari Alisher domla Naimov hamda Buvayda tumani bosh imom-xatibi Ahmadxon domla Nizomovlar ishtirok etib, yosh kadrlar bilan suhbat qurdilar.
Uchrashuv davomida yurtimizda diniy-ma’rifiy sohada amalga oshirilayotgan islohotlar, imom-xatiblar uchun yaratilayotgan imkoniyat va shart-sharoitlar haqida atroflicha ma’lumot berildi. Ma’ruzachi ustozlar imomlikning ulug‘ sharafi va yuksak mas’uliyati haqida so‘z yuritib, yoshlarni o‘z vazifasiga sidqidildan yondoshishga da’vat etdilar. Shuningdek, ular o‘z hayotiy tajribalari va amaliy mashg‘ulotlari bilan o‘rtoqlashdilar.
Ma’lumot o‘rnida aytish joizki, joriy yilda diniy ta’lim muassasalarini tamomlagan 26 nafar bitiruvchi viloyatdagi turli masjidlarga imom-xatib va imom-noibi vazifalariga tayinlandi. Bu esa sohaga yosh kadrlarni jalb etishdagi muhim qadamlardan biri bo‘ldi.
Muloqot so‘ngida yoshlarga ularning mas’uliyatli xizmat yo‘lida muvaffaqiyat va fathlarni Allohdan so‘rab duo qilindi.
