21-22 апрель кунлари Марказий Осиё халқаро институти Лондондаги “Bourse & Bazaar” жамғармаси билан ҳамкорликда Марказий Осиё мамлакатлари ва Кўрфаз араб давлатлари ҳамкорлик кенгаши етакчи таҳлилий марказлари вакиллари иштирокида давра суҳбати ташкил этади.
Жорий йил 5 май куни Самарқандда бўлиб ўтадиган Марказий Осиё ва Кўрфаз араб давлатлари раҳбарлари иккинчи саммити арафасида ташкил этилаётган мазкур тадбир ушбу йирик халқаро анжуманга тайёргарлик жараёнини экспертлар даражасида таҳлил қилиш учун муҳим майдон бўлиб хизмат қилади.
Форумда Ўзбекистон, Қозоғистон, Қирғизистон, Тожикистон, Туркманистон, Саудия Арабистони, Қатар, БАА, Ўмон каби давлатлардан етакчи таҳлилий, дипломатик ва академик муассасаларнинг 40 нафарга яқин таниқли эксперт иштирок этади. Улар орасида илмий тадқиқотчилар, ҳукумат ва мустақил илмий-тадқиқот марказлари вакиллари, ёндош университетлар вакиллари ҳам бор.
Учрашув давомида икки минтақа ҳамкорлигининг асосий йўналишлари муҳокама қилинади. Хусусан, транспорт ва минтақавий боғлиқлик, энергетика, озиқ-овқат ва иқлим хавфсизлиги каби мавзулар кун тартибидан ўрин олган.
Форум якунида дипломатик корпус, илмий доира ва ОАВ вакиллари билан уюштириладиган матбуот брифингида эксперт муҳокамаси давомида ишлаб чиқилган асосий хулоса, тавсиялар тақдим этилади.
Ғ.Хонназаров, ЎзА
***
21-22 aprel kunlari Markaziy Osiyo xalqaro instituti Londondagi “Bourse & Bazaar” jamg‘armasi bilan hamkorlikda Markaziy Osiyo mamlakatlari va Ko‘rfaz arab davlatlari hamkorlik kengashi yetakchi tahliliy markazlari vakillari ishtirokida davra suhbati tashkil etadi.
Joriy yil 5 may kuni Samarqandda bo‘lib o‘tadigan Markaziy Osiyo va Ko‘rfaz arab davlatlari rahbarlari ikkinchi sammiti arafasida tashkil etilayotgan mazkur tadbir ushbu yirik xalqaro anjumanga tayyorgarlik jarayonini ekspertlar darajasida tahlil qilish uchun muhim maydon bo‘lib xizmat qiladi.
Forumda O‘zbekiston, Qozog‘iston, Qirg‘iziston, Tojikiston, Turkmaniston, Saudiya Arabistoni, Qatar, BAA, O‘mon kabi davlatlardan yetakchi tahliliy, diplomatik va akademik muassasalarning 40 nafarga yaqin taniqli ekspert ishtirok etadi. Ular orasida ilmiy tadqiqotchilar, hukumat va mustaqil ilmiy-tadqiqot markazlari vakillari, yondosh universitetlar vakillari ham bor.
Uchrashuv davomida ikki mintaqa hamkorligining asosiy yo‘nalishlari muhokama qilinadi. Xususan, transport va mintaqaviy bog‘liqlik, energetika, oziq-ovqat va iqlim xavfsizligi kabi mavzular kun tartibidan o‘rin olgan.
Forum yakunida diplomatik korpus, ilmiy doira va OAV vakillari bilan uyushtiriladigan matbuot brifingida ekspert muhokamasi davomida ishlab chiqilgan asosiy xulosa, tavsiyalar taqdim etiladi.
G‘.Xonnazarov, O‘zA
