Ҳафтанинг чоршанба куни Фарғона вилоятининг ҳар бир шаҳар-туманида «Маънавият машғулотлари» ўтказиш йўлга қўйилган. Имом-хатиблар ва имом-ноиблари иштирокида ўтадиган ушбу машғулотларда фаолият таҳлил қилинади, ўтган ҳафта давомида амалга оширилган ишлар муҳокама қилиниб, келгуси ҳафтада амалга оширилиши лозим бўлган ишлар режаси тузилади.
Бувайда туманида 14 та масжид фаолият кўрсатмоқда. Мазкур масжидларда 25 нафар имом-хатиб ва имом-ноиблари хизмат қилишмоқда. Фарғона вилояти бош имом-хатиби Убайдуллоҳ домла Абдуллаев туманга ташриф буюрди. Дастлаб, тумандаги «Пошшопирим» масжиди кўздан кечирилди, намозхонларга яратилган шарт-шароитлар, куз-қиш мавсумига тайёргарлик ўрганилди. Намозхонлар бўш вақтида китоб мутолаа қилишлари учун масжид кутубхонасини бойитиш, зарурий анжомлар билан таъминлаш лозимлиги қайд этилди.
Шундан сўнг вилоят бош имом-хатиби имом-хатиблар билан учрашди. Амалга ошрилган ишлар таҳлил қилиниб, фаол бўлган соҳа ходимларининг хизмати эътироф этилди. Фаолиятида сусткашлик ва масъулиятсизликка йўл қўяётганларга танбеҳ берилиб, дин хизмати юксак шараф, шу билан бирга у омонат экани эслатилди.
Бугунги кунда юртимизда Қуръони каримни ўрганиш, уни ўргатишга бўлган эътибор ортмоқда. Жойларда «Қуръони карим ва тажвид курс»лари очилмоқда. Ҳозирда Бувайда туманида ҳам ана шундай даргоҳ фаолият юритмоқда. Вилоят бош имом-хатиби Убайдуллоҳ домла Абдуллаев ушбу даргоҳда таҳсил олаётган тингловчилар билан учрашиб, уларни муборакбод этдилар. Қуръони каримни тажвид ва тартил ила тиловат қилиш катта бахт, уни тушуниб, аҳкомларини ҳаётга тадбиқ этиш тақвонинг нишони, бу каби даргоҳлар бизга Аллоҳнинг берган юксак неъмати, буни қадрига етиш, ундан оқилона фойданиш лозимлиги, шунингдек, хулқимиз Қуръон ила юксалиши икки дунё саодати эканини таъкидладилар. Тадбир якунида ўқув курсининг навбатдаги босқичини якунлаган тингловчиларга шаҳодатнома топширилди ва юртимиз тинчлиги, халқимиз фаровонлиги, динимиз ривожини сўраб дуога қўл очилди.
