Юртимизда миллий ва диний қадриятларни асраш, мўмин-мусулмонлар ибодатини эмин-эркин адо этишлари учун кенг кўламли ишлар олиб борилмоқда. Бу борада масжидлар нафақат ибодат, балки ахлоқ ва маърифат маскани сифатида хизмат қилмоқда.
Олтиариқ туманидаги «Хожа Абдуллоҳ ал-Ансорий» жоме масжиди ҳам ана шундай улкан ўзгаришларга гувоҳ бўлди. Мазкур масжид тубдан қайта қурилиб, замонавий талабларга жавоб берадиган ҳолда фойдаланишга топширилди.
Фарғона ва Қўқон шаҳарини боғлаб турган асосий йўл бўйлаб, туманнинг Азимобод маҳалласидан жой олган ушбу масжид бугунги кунда нафақат маҳаллий аҳоли, балки йўловчилар учун ҳам руҳий ва маънавий қувват манбаи бўлмоқда.
Масжид “New Classic” услубида, миллий меъморчилик анъаналари ва замонавий архитектура ечимлари уйғунлигида барпо этилди. Унинг ташқи кўриниши ва ички дизайнида кўп асрлик меросимизга хос услублар ва ҳозирги замон қулайликлари мукаммал уйғунлашган.
Янгидан қурилган жоме масжид 1500 нафардан зиёд намозхонни ўз бағрига сиғдира олади. Хонақоҳ, таҳоратхона ва бошқа зарур инфратузилмалар бир-бирига ҳамоҳанг тарзда барпо этилган.
Мазкур масжиднинг қайта қурилишида маҳаллий аҳоли, саховатпеша тадбиркорлар ва ҳомийлар ўз ҳиссаларини қўшдилар. Уларнинг меҳнатсеварлиги ва фидокорона хизмати билан бугун бу маскан юртимиз кўркига кўрк қўшмоқда.
***
Yurtimizda milliy va diniy qadriyatlarni asrash, mo‘min-musulmonlar ibodatini emin-erkin ado etishlari uchun keng ko‘lamli ishlar olib borilmoqda. Bu borada masjidlar nafaqat ibodat, balki axloq va ma’rifat maskani sifatida xizmat qilmoqda.
Oltiariq tumanidagi «Xoja Abdulloh al-Ansoriy» jome masjidi ham ana shunday ulkan o‘zgarishlarga guvoh bo‘ldi. Mazkur masjid tubdan qayta qurilib, zamonaviy talablarga javob beradigan holda foydalanishga topshirildi.
Farg‘ona va Qo‘qon shaharini bog‘lab turgan asosiy yo‘l bo‘ylab, tumanning Azimobod mahallasidan joy olgan ushbu masjid bugungi kunda nafaqat mahalliy aholi, balki yo‘lovchilar uchun ham ruhiy va ma’naviy quvvat manbai bo‘lmoqda.
Masjid “New Classic” uslubida, milliy me’morchilik an’analari va zamonaviy arxitektura yechimlari uyg‘unligida barpo etildi. Uning tashqi ko‘rinishi va ichki dizaynida ko‘p asrlik merosimizga xos uslublar va hozirgi zamon qulayliklari mukammal uyg‘unlashgan.
Yangidan qurilgan jome masjid 1500 nafardan ziyod namozxonni o‘z bag‘riga sig‘dira oladi. Xonaqoh, tahoratxona va boshqa zarur infratuzilmalar bir-biriga hamohang tarzda barpo etilgan.
Mazkur masjidning qayta qurilishida mahalliy aholi, saxovatpesha tadbirkorlar va homiylar o‘z hissalarini qo‘shdilar. Ularning mehnatsevarligi va fidokorona xizmati bilan bugun bu maskan yurtimiz ko‘rkiga ko‘rk qo‘shmoqda.
