Бу ҳақда АОКАда ўтказилган брифингда “Uzbekistan Airways” АЖ ахборот хизмати раҳбари Дилором Каимбаева маълум қилди.
Uzbekistan Airways авиакомпанияси Ўзбекистон Мусулмонлари идораси билан биргаликда “Ҳаж-2024” дастури доирасида жорий йилнинг 23-май кунидан бошлаб Саудия Арабистонига чартер йўловчи авиақатновларини амалга оширишни бошлайди.
“Ҳаж” дастури бўйича маросимларни бажариш истагида бўлган зиёратчилар эртадан, яъни 23-майдан 7-июнга қадар, Ўзбекистон Республикасининг 10 та минтақавий халқаро аэропортларидан, хусусан, Тошкент, Наманган, Фарғона, Бухоро, Самарқанд, Қарши, Термиз, Навоий, Нукус ва Урганч шаҳарларидан Саудия Арабистоннинг Мадина шаҳрига етказилади.
Жиддадан Ўзбекистон Республикаси шаҳарларига қайтувчи парвозлар эса 22-июндан 12-июлга қадар бажарилиши режалаштирилган.
Авиакомпания ва Ўзбекистон Мусулмонлари идораси ўртасида тузилган шартномага мувофиқ, жорий йилда жами 124 та чартер йўловчи парвозларини амалга ошириб, 15 130 нафар зиёратчиларни ташиш режалаштирилган.
Uzbekistan Airways’нинг “Ҳаж-2024” дастури доирасидаги барча авиақатновлари Боэинг 767 ҳаво кемаларида амалга оширилади.
Таъкидлаш жоизки, республика аэропортларида рўйхатдан ўтиш вақтида йўловчилар иссиқ нонушта билан таъминланади. Парвоз давомида эса Ўзбекистон Мусулмонлари идораси талабларини инобатга олган ҳолда тайёрланган махсус таомлар тарқатилади.
Бундан ташқари, Uzbekistan Airways Sales филиали томонидан Ўзбекистондан Саудия Арабистонига зиёратчиларни олиб бориш даврида кассирларнинг кечаю кундуз ишлаши ташкил этилган.
***
Bu haqda AOKAda o‘tkazilgan brifingda “Uzbekistan Airways” AJ axborot xizmati rahbari Dilorom Kaimbayeva ma’lum qildi.
Uzbekistan Airways aviakompaniyasi O‘zbekiston Musulmonlari idorasi bilan birgalikda “Haj-2024” dasturi doirasida joriy yilning 23-may kunidan boshlab Saudiya Arabistoniga charter yo‘lovchi aviaqatnovlarini amalga oshirishni boshlaydi.
“Haj” dasturi boʻyicha marosimlarni bajarish istagida boʻlgan ziyoratchilar ertadan, ya’ni 23-maydan 7-iyunga qadar, Oʻzbekiston Respublikasining 10 ta mintaqaviy xalqaro aeroportlaridan, xususan, Toshkent, Namangan, Fargʻona, Buxoro, Samarqand, Qarshi, Termiz, Navoiy, Nukus va Urganch shaharlaridan Saudiya Arabistonning Madina shahriga yetkaziladi.
Jiddadan O‘zbekiston Respublikasi shaharlariga qaytuvchi parvozlar esa 22-iyundan 12-iyulga qadar bajarilishi rejalashtirilgan.
Aviakompaniya va O‘zbekiston Musulmonlari idorasi o‘rtasida tuzilgan shartnomaga muvofiq, joriy yilda jami 124 ta charter yo‘lovchi parvozlarini amalga oshirib, 15 130 nafar ziyoratchilarni tashish rejalashtirilgan.
Uzbekistan Airways’ning “Haj-2024” dasturi doirasidagi barcha aviaqatnovlari Boeing 767 havo kemalarida amalga oshiriladi.
Ta’kidlash joizki, respublika aeroportlarida ro‘yxatdan o‘tish vaqtida yo‘lovchilar issiq nonushta bilan ta’minlanadi. Parvoz davomida esa O‘zbekiston Musulmonlari idorasi talablarini inobatga olgan holda tayyorlangan maxsus taomlar tarqatiladi.
Bundan tashqari, Uzbekistan Airways Sales filiali tomonidan O‘zbekistondan Saudiya Arabistoniga ziyoratchilarni olib borish davrida kassirlarning kechayu kunduz ishlashi tashkil etilgan.
