Қўштепа туманининг Сармазор даҳасида жойлашган «Қорашбува» жоме масжиди янги лойиҳа асосида қайта бунёд этилди. Масжидни барпо этишда миллий ва замонавий қурилиш имкониятларидан фойдаланилганини кўриш мумкин. Намозхонлар учун қишда иссиқ, ёзда салқин муҳитнинг яратилгани, бинонинг мустаҳкамлиги ва бежиримлигига алоҳида эътибор қаратилгани эътиборга моликдир.
Масжиднинг эски биноси бир юз эллик, икки юз киши ўртасида жамоатни бағрига олган бўлса, янги бино бир ярим минг намозхонни қамраб олади.
Байтуллоҳнинг янги биноси очилиши муносабати билан тадбир бўлиб ўтди. Унда вилоят ҳокими ўринбосари Ж.Хатамов, вилоят бош имом-хатиби Убайдуллоҳ домла Абдуллаев, туман ҳокими И.Новиков ҳамда бир гуруҳ нуронийлар иштирок этди.
Меҳмонлар сўз олиб, масжид аҳлини муборакбод этдилар. Пешин намози адо этилгач, вилоят бош имом-хатиби Убайдуллоҳ домла Абдуллаев нутқ сўзлаб, масжидлар биносини мустаҳкам, кўркам тарзда қурилиши уни моддий обод қилиш бўлса, бу ердаги қилинаётган ибодат, зикр, ваъзу иршодлар билан қалб, руҳ покланиши масжидларни маънавий обод қилиш экани, бир сўз билан айтганда, масжидлар обод бўлиши билан мўмин-мусулмонларнинг хулқи ҳам ислоҳ бўлиб бориши зарурлиги қайд этилди.
Тадбир ниҳоясида масжид қурилишида ҳиссасини қўшганлар ҳаққига дуо қилинди.
