Масжидлар Аллоҳ таолонинг байти, ер юзидаги энг покиза ва тоза маконлардир. Уларнинг минораларидан муаззинларнинг овозлари янграйди, у жойга фаришталар тушишади, раҳматлар ёғилади, масжид аҳлининг устига баракалар ёғилади. Масжидларда мусулмонлар бир-бирлари билан танишадилар, улфат бўладилар, бир-бирларига ёрдам бериб, ҳамжиҳат бўладилар, бир-бирларини зиёрат қилиб, бир-бирларига раҳм-шафқат кўрсатадилар. Бунинг натижасида ораларида боғланиш, дўстлик, меҳрибонлик кучаяди.
Аллоҳ таоло Қуръони каримда “Албатта, Аллоҳнинг масжидларини фақат Аллоҳга ва охират кунига иймон келтирганлар, намозни тўкис адо этганлар, закотни берганлар ва Аллоҳдан бошқадан қўрқмаганларгина обод қилурлар…” (Тавба сураси, 18-оят) деган.
Охирги йилларда диёримизда диний-маърифий соҳада кўплаб хайрли ислоҳотлар амалга ошириб келинмоқда. Айниқса, масжидларни обод этиш, ибодатга келувчилар учун энг олий даражадаги қулайликлар муҳайё қилинмоқда.
«Учкўприк» жомесининг янги биноси муборак ой олдидан учкўприкликлар учун муносиб туҳфа бўлди. Миллий ва замонавий уйғунликни ўзида мужассам қилган Байтуллоҳда илк жума намози адо этилди. Унда вилоят бош имом-хатиби Убайдуллоҳ домла Абдуллаев, Бувайда тумани бош имом-хатиби Аҳмадхон домла Низомовлар иштирок этишди.
Убайдуллоҳ домла Абдуллаев юртдошларимизни кириб келаётган Рамазон ойи билан муборакбод этиб, масжидларни обод этилишида, аввало, юртимизда диний-маърифий соҳага қаратилаётган эътибор, қолаверса, саховатпеша ва ҳимматли халқимизнинг саъй-ҳаракатлари катта экани таъкидладилар.
Жамоат билан жума намози адо этилиб, якунда юрт равнақи, халқ фаровонлиги, динимиз ривожи ҳамда Рамазон ойи барокатли бўлишини сўраб дуо қилинди.
* * *
Masjidlar Alloh taoloning bayti, yer yuzidagi eng pokiza va toza makonlardir. Ularning minoralaridan muazzinlarning ovozlari yangraydi, u joyga farishtalar tushishadi, rahmatlar yog‘iladi, masjid ahlining ustiga barakalar yog‘iladi. Masjidlarda musulmonlar bir-birlari bilan tanishadilar, ulfat bo‘ladilar, bir-birlariga yordam berib, hamjihat bo‘ladilar, bir-birlarini ziyorat qilib, bir-birlariga rahm-shafqat ko‘rsatadilar. Buning natijasida oralarida bog‘lanish, do‘stlik, mehribonlik kuchayadi.
Alloh taolo Qur’oni karimda “Albatta, Allohning masjidlarini faqat Allohga va oxirat kuniga iymon keltirganlar, namozni to‘kis ado etganlar, zakotni berganlar va Allohdan boshqadan qo‘rqmaganlargina obod qilurlar…” (Tavba surasi, 18-oyat) degan.
Oxirgi yillarda diyorimizda diniy-ma’rifiy sohada ko‘plab xayrli islohotlar amalga oshirib kelinmoqda. Ayniqsa, masjidlarni obod etish, ibodatga keluvchilar uchun eng oliy darajadagi qulayliklar muhayyo qilinmoqda.
«Uchko‘prik» jomesining yangi binosi muborak oy oldidan uchko‘prikliklar uchun munosib tuhfa bo‘ldi. Milliy va zamonaviy uyg‘unlikni o‘zida mujassam qilgan Baytullohda ilk juma namozi ado etildi. Unda viloyat bosh imom-xatibi Ubaydulloh domla Abdullayev, Buvayda tumani bosh imom-xatibi Ahmadxon domla Nizomovlar ishtirok etishdi.
Ubaydulloh domla Abdullayev yurtdoshlarimizni kirib kelayotgan Ramazon oyi bilan muborakbod etib, masjidlarni obod etilishida, avvalo, yurtimizda diniy-ma’rifiy sohaga qaratilayotgan e’tibor, qolaversa, saxovatpesha va himmatli xalqimizning sa’y-harakatlari katta ekani ta’kidladilar.
Jamoat bilan juma namozi ado etilib, yakunda yurt ravnaqi, xalq farovonligi, dinimiz rivoji hamda Ramazon oyi barokatli bo‘lishini so‘rab duo qilindi.
