Фарғона вилояти вакиллигида «27 июнь – Матбуот ва оммавий ахборот воситалари ходимлари куни» муносабати билан тантанали тадбир бўлиб ўтди. Унда диний-маърифий соҳада фаолият олиб бораётган ҳамкор ОАВ вакиллари ҳамда вилоят вакиллиги Матбуот хизмати ходимлари иштирок этдилар.
Тадбирда сўзга чиққан Фарғона вилояти бош имом-хатиби Убайдуллоҳ домла Абдуллаев барча соҳа ходимларини касб байрами билан самимий табриклаб, уларнинг жамиятда тутган ўрни ва масъулияти ҳақида сўз юритди. Таъкидланишича, диний-маърифий соҳада амалга оширилаётган ислоҳотлар ва ўзгаришларни кенг жамоатчиликка етказишда оммавий ахборот воситалари муҳим ўрин тутади. Хусусан, медиа соҳаси вакиллари ёш авлодни ватанпарварлик, инсонийлик, бағрикенглик ва маънавий баркамоллик руҳида тарбиялашда фаол иштирок этмоқда.
Тадбир давомида сўзга чиққан журналистлар ҳам кўрсатилаётган эътибор ва эътироф учун миннатдорлик билдиришди. Улар бундай яқин ҳамкорлик келгусида янада самарали ишларни амалга оширишга туртки бўлишини қайд этишди.
Айтиш жоизки, Фарғона вилояти вакиллиги Ўзбекистон мусулмонлари идорасининг Muslim.uz портали, “Ҳидоят” журнали, “Ислом нури” газетаси, ЎзА, Фарғона МТРК, “Рухсор” телерадиоканали, “Севимли” телеканали, “Янги Фарғона” ва “Фарғона ҳақиқати” каби қатор ОАВ билан яқин ҳамкорлик ўрнатган. Вилоятда амалга оширилаётган диний-маърифий ислоҳотлар, имом-хатиблар ва отинойиларнинг фаолияти ҳақидаги материаллар ушбу ОАВ орқали халқимизга етказилмоқда.
Тадбир якунида Фарғона вилояти бош имом-хатиби Убайдуллоҳ домла Абдуллаев томонидан фаол иштирок этган ҳамкор ОАВ вакиллари ҳамда вакиллик Матбуот хизмати ходимларига ташаккурномалар ва эсдалик совғалар топширилди.
***
Farg‘ona viloyati vakilligida «27 iyun – Matbuot va ommaviy axborot vositalari xodimlari kuni» munosabati bilan tantanali tadbir bo‘lib o‘tdi. Unda diniy-ma’rifiy sohada faoliyat olib borayotgan hamkor OAV vakillari hamda viloyat vakilligi Matbuot xizmati xodimlari ishtirok etdilar.
Tadbirda so‘zga chiqqan Farg‘ona viloyati bosh imom-xatibi Ubaydulloh domla Abdullayev barcha soha xodimlarini kasb bayrami bilan samimiy tabriklab, ularning jamiyatda tutgan o‘rni va mas’uliyati haqida so‘z yuritdi. Ta’kidlanishicha, diniy-ma’rifiy sohada amalga oshirilayotgan islohotlar va o‘zgarishlarni keng jamoatchilikka yetkazishda ommaviy axborot vositalari muhim o‘rin tutadi. Xususan, media sohasi vakillari yosh avlodni vatanparvarlik, insoniylik, bag‘rikenglik va ma’naviy barkamollik ruhida tarbiyalashda faol ishtirok etmoqda.
Tadbir davomida so‘zga chiqqan jurnalistlar ham ko‘rsatilayotgan e’tibor va e’tirof uchun minnatdorlik bildirishdi. Ular bunday yaqin hamkorlik kelgusida yanada samarali ishlarni amalga oshirishga turtki bo‘lishini qayd etishdi.
Aytish joizki, Farg‘ona viloyati vakilligi O‘zbekiston musulmonlari idorasining Muslim.uz portali, “Hidoyat” jurnali, “Islom nuri” gazetasi, O‘zA, Farg‘ona MTRK, “Ruxsor” teleradiokanali, “Sevimli” telekanali, “Yangi Farg‘ona” va “Farg‘ona haqiqati” kabi qator OAV bilan yaqin hamkorlik o‘rnatgan. Viloyatda amalga oshirilayotgan diniy-ma’rifiy islohotlar, imom-xatiblar va otinoyilarning faoliyati haqidagi materiallar ushbu OAV orqali xalqimizga yetkazilmoqda.
Tadbir yakunida Farg‘ona viloyati bosh imom-xatibi Ubaydulloh domla Abdullayev tomonidan faol ishtirok etgan hamkor OAV vakillari hamda vakillik Matbuot xizmati xodimlariga tashakkurnomalar va esdalik sovg‘alar topshirildi.
