Марғилон шаҳридаги «Саид Жалолхон тўра» масжиди имом-хатиби Юнусхон домла Мамарасулов муаллифлигидаги «Маърифат ниқоби остидаги маърифатсизлар» китоби нашрдан чиқди. Ушбу рисолада ўзининг аҳли сунна вал жамоага қарши фикр ва қарашлари билан маълум бўлган “Маърифатчи” ёки “Шоҳидийлар” деб ном олган тоифа ҳақида халқимизни огоҳ этишни мақсад қилинган. Китобнинг нашрга келиши ҳақида муаллиф шундай дейди:
— Бош имом-хатиблик вазифасида бўлиб турган кезларим хуфтон намозидан сўнг бир йигит отасининг эътиқоди юзасидан сўраб қилиб қолди. Унинг айтишича, отаси намозни ўзбек тилида ўқир, жанозаларга қатнашмас, жума намози фарз эмас, ҳадис ҳужжат сифатида олинмайди, деган даъволарни қилар, Қуръонда бор нарсани қиламиз, унда йўқ нарсани қилмаймиз, деган иддаога эргашар экан. Фарзанд отасининг бу йўли тўғрими ёки йўқми деган ўй билан камина ходимингизга мурожат қилди. Мен бу даъволар нотўғри эканлигини далиллар билан унга тушунтирдим. Боланинг кўнгли таскин топди, аммо менда бир ташвиш пайдо бўлди. Халқимизни бу ботил йўлдан огоҳ этиш мақсадида, бу тоифани ўзим билган жиҳатларини ўрганиб, улар бор ҳудуддаги имом домлаларимиз ҳамда бир қанча мўмин-мусулмонлар билан суҳбатлашдим. Уларнинг яна қандай даъволари бор эканлигини аниқладим. Натижада Аллоҳ азза ва жалланинг ёрдами ва тавфиқи ила ушбу рисола вужудга келди.
Рисолада юқорида келтирилган масалаларга илмий равишда ечим берилган. Аллоҳ ушбу нашрни халқимизга манфаатли қилсин!
