Ҳаж ибодатини адо этган ҳожиларнинг “Янги Ўзбекистоннинг фидойиси бўлиб, маънавият тарғиботчисига айланамиз” ташаббуси доирасидаги эзгу ишлар юртимиз бўйлаб кенг қулоч ёймоқда. Рамазон ойи шарифда ўтказилаётган маънавий-маърифий ва амалий тадбирлардан бири Марғилон шаҳрида бўлиб ўтди. Ушбу тадбирга Ўзбекистон мусулмонлари идорасининг Фарғона вилояти вакили, вилоят бош имом-хатиби Убайдуллоҳ домла Абдуллаев бошчилик қилди.
Тадбир доирасида имом-хатиблар 124 та оилага кириб, маънавий-маърифий тарғибот ва амалий ёрдам кўрсатдилар. Аҳоли билан ўтказилган мулоқотлар давомида эҳтиёжманд фуқароларга ҳам моддий, ҳам маънавий жиҳатдан қўллаб-қувватлаш ишлари амалга оширилди.
“Робия ҳожи она” масжиди ҳудудида яшовчи кам таъминланган оила учун Киргули маҳалласида уч хонали уй қурилиб, фойдаланишга топширилди. Бундан ташқари, “Имом Заҳриддин” жоме масжиди ҳудудидаги хонадонда содир бўлган ёнғин оқибатида уй катта талофат кўрган ва оилабоши вафот этганлиги инобатга олиниб, ҳомийлар кўмагида ушбу хонадон ҳам моддий ва маънавий жиҳатдан қўллаб-қувватланиб келинаётгани эътироф этилди.
Шунингдек, пешин намозидан сўнг қилинган долзарб мавзулардаги мавъизалар жамоат орасида катта таассурот қолдирди. Ҳозиргина қилинган хайрли ишлар маънавий тарғиботнинг амалдаги намунаси эканини яна бир бор кўрсатди.
Якунда хатми Қуръонлар етказилиб, юрт равнақи ва тинчлиги, хотиржамлик ва фаровонлигимиз барқарор бўлишини сўраб дуо қилинди.
***
Haj ibodatini ado etgan hojilarning “Yangi O‘zbekistonning fidoyisi bo‘lib, ma’naviyat targ‘ibotchisiga aylanamiz” tashabbusi doirasidagi ezgu ishlar yurtimiz bo‘ylab keng quloch yoymoqda. Ramazon oyi sharifda o‘tkazilayotgan ma’naviy-ma’rifiy va amaliy tadbirlardan biri Marg‘ilon shahrida bo‘lib o‘tdi. Ushbu tadbirga O‘zbekiston musulmonlari idorasining Farg‘ona viloyati vakili, viloyat bosh imom-xatibi Ubaydulloh domla Abdullayev boshchilik qildi.
Tadbir doirasida imom-xatiblar 124 ta oilaga kirib, ma’naviy-ma’rifiy targ‘ibot va amaliy yordam ko‘rsatdilar. Aholi bilan o‘tkazilgan muloqotlar davomida ehtiyojmand fuqarolarga ham moddiy, ham ma’naviy jihatdan qo‘llab-quvvatlash ishlari amalga oshirildi.
“Robiya hoji ona” masjidi hududida yashovchi kam ta’minlangan oila uchun Kirguli mahallasida uch xonali uy qurilib, foydalanishga topshirildi. Bundan tashqari, “Imom Zahriddin” jome masjidi hududidagi xonadonda sodir bo‘lgan yong‘in oqibatida uy katta talofat ko‘rgan va oilaboshi vafot etganligi inobatga olinib, homiylar ko‘magida ushbu xonadon ham moddiy va ma’naviy jihatdan qo‘llab-quvvatlanib kelinayotgani e’tirof etildi.
Shuningdek, peshin namozidan so‘ng qilingan dolzarb mavzulardagi mav’izalar jamoat orasida katta taassurot qoldirdi. Hozirgina qilingan xayrli ishlar ma’naviy targ‘ibotning amaldagi namunasi ekanini yana bir bor ko‘rsatdi.
Yakunda xatmi Qur’onlar yetkazilib, yurt ravnaqi va tinchligi, xotirjamlik va farovonligimiz barqaror bo‘lishini so‘rab duo qilindi.
