Вилоят ҳокими Хайрулло Бозоров Фарғонада тиббиёт ва энергетика соҳасида ўз инвестицион лойиҳаларини амалга оширишга киришаётган Қувайтнинг “Energy Solutions” компанияси бош директори Муҳаммeд Саса ал-Салеҳни ҳамда ушбу компаниянинг ҳамкори Саудия Арабистонининг “Johnsons Controls Arabia (York)” компанияси вакилларини қабул қилди.
“Johnsons Controls Arabia (York)” ақлли технологияларга асосланган қурилиш технологиялари, бинолар учун совутиш, иситиш ва вентиляция тизимларини ишлаб чиқарувчи йирик компания бўлиб, Дубайдаги Бурж Халифа ҳамда Нью-Йоркдаги Эмпайр-стейт-билдинг осмонўпар бинолари, Макка шаҳридаги Каъба биноси ҳамда Мадина шаҳридаги Набавий масжиди каби дунёдаги юзлаб йирик иншоотларда ушбу компаниянинг тизимлари ўрнатилган. Шунингдек, компаниянинг Арабистондаги Қирол Абдуллоҳ иқтисодий шаҳрида 200 км. кв. майдонда жойлашган, дунёдаги энг йирик ишлаб чиқариш корхоналаридан бирида York маркаси остида кондиционерлар ишлаб чиқарилади.
Вилоят ҳокимлигида бўлиб ўтган учрашувда Фарғона вилояти ҳудудида ҳамкорликда инвестицион ишлаб чиқариш лойиҳаларини амалга ошириш истиқболлари муҳокама қилинди.
Фарғонада барпо этилаётган Экошаҳар учун энергия сарфини 25-30 фоизга қисқартиришни кўзда тутган комплекс энергия тежамкорлиги тизими жорий этиш лойиҳаси юзасидан ҳам фикр алмашилди.
Яқин даврда Фарғона вилояти делегациясининг Қирол Абдуллоҳ иқтисодий шаҳридаги Johnsons Controls Arabia корхонасига ташрифини ташкиллаш ҳамда музокараларни навбатдаги босқичда давом эттиришга келишиб олинди.
Учрашувда вилоят ҳокимининг ўринбосари Иқболжон Эргашев ҳам иштирок этди.
