Қурбон ҳайити намозини адо этиш учун ҳам саноқли фурсатлар қолмоқда. Бу кунни мўмин-мусулмонлар ҳайит намозини ўқиш билан бошлайдилар. Намоздан сўнг бева-бечоралар ҳолидан хабар олиш, фақиру камбағалларга моддий ёрдам кўрсатиш, болаларга ҳайитлик совғалари улашиш халқимиз ичида анъанага айланган.
Пайғамбаримиз саллаллоҳу алайҳи васаллам ҳадиси шарифларининг бирида: “Дарҳақиқат, бугунги кунда ишимизнинг аввали ийдул азҳо (қурбон ҳайити) намозини ўқиш, сўнгра (уйларимизга) қайтиб, қурбонлик қилишдир. Кимки, шуларни бажарса, у суннатимизга мувофиқ иш қилибди. Ким ҳайит намозидан олдин сўйса, у қурбонлик эмас, балки ўз аҳли учун тақдим қилган гўштдир” (Имом Бухорий ривоятлари) дея марҳамат қилганлар.
Шу эътибордан ҳайит куни эрта тонгдан мўмин-мусулмонлар ҳайит намозини адо этиш учун масжидга келадилар. Масжидларда эса ҳайит намозини адо этиш, жамоатга қулайлик ва зарур шарт-шароитларни ҳозирлаш учун қизғин тайёргарлик ишлари олиб борилди. Санитария-гигиена талаблари, техник хавфсизлик чоралари ҳамда ободонлаштириш ишлари амалга оширилди. Қабристон ва зиёратгоҳларга ҳам алоҳида эътибор берилди.
Эртанги Қурбон ҳайити намозини ўқиш учун Фарғона вилоятидаги 193 та масжид шай ҳолатга келтирилди. Вилоят бош имом-хатиби Убайдуллоҳ домла Абдуллаев ҳаж сафарида бўлган имом-хатиблар ўрнига тайинланган имом-ноиблари билан мулоқот ўтказиб, ҳайит намозини ўқиш тартиби, мавъиза ва хутбаларни адо этиш тартиблари бўйича керакли кўрсатма ва маслаҳатларни берди.
Қурбон ҳайити намози ўқилиши муносабати билан масжидларга келиб-кетишда аҳолига қулайлик яратиш мақсадида вилоят Транспорт бошқармаси томонидан шаҳарлардаги мавжуд жамоат транспорти (автобус) фаолияти тонгги соат 03:00 дан бошлаб йўлга қўйилади.
Бундан ташқари ҳозирги кунда, Фарғона шаҳридаги “Муҳаммад Авлиё”, Марғилон шаҳридаги “Хожа Порсо”, Ўзбекистон туманидаги “Ўқчи”, Сўх туманидаги “Хазрати али”, Қува туманидаги “Абу Ҳанифа” ва Бувайда туманидаги “Мансурхон тўра” масжидларида қурилиш ишлари олиб борилаётганлиги ва ушбу масжидларда “Қурбон ҳайити” намози ўқилмаслигини инобатга олиб, ушбу ҳудуддаги фуқароларга қулайлик яратиш мақсадида, вилоят Транспорт бошқармаси ҳамда ИИБ ЖҲХ ЙХҲБ ҳамкорликда, худудларда фаолият кўрсатаётган бошқа масжидларга фуқароларни ўз вақтида хавфсиз етказиб қўйиш учун, тонгги соат 03:00 дан бошлаб вақтинчалик автобус қатновлари ташкил этилади.
Фарғона вилоятида Қурбон ҳайити намози 16 июнь куни 05:00 да ўқилади.
Фурсатдан фойдаланиб, Фарғона вилояти вакиллиги юртимиз мўмин-мусулмонларини Қурбон ҳайити билан самимий муборакбод этади.
***
Qurbon hayiti namozini ado etish uchun ham sanoqli fursatlar qolmoqda. Bu kunni mo‘min-musulmonlar hayit namozini o‘qish bilan boshlaydilar. Namozdan so‘ng beva-bechoralar holidan xabar olish, faqiru kambag‘allarga moddiy yordam ko‘rsatish, bolalarga hayitlik sovg‘alari ulashish xalqimiz ichida an’anaga aylangan.
Payg‘ambarimiz sallallohu alayhi vasallam hadisi shariflarining birida: “Darhaqiqat, bugungi kunda ishimizning avvali iydul azho (qurbon hayiti) namozini o‘qish, so‘ngra (uylarimizga) qaytib, qurbonlik qilishdir. Kimki, shularni bajarsa, u sunnatimizga muvofiq ish qilibdi. Kim hayit namozidan oldin so‘ysa, u qurbonlik emas, balki o‘z ahli uchun taqdim qilgan go‘shtdir” (Imom Buxoriy rivoyatlari) deya marhamat qilganlar.
Shu e’tibordan hayit kuni erta tongdan mo‘min-musulmonlar hayit namozini ado etish uchun masjidga keladilar. Masjidlarda esa hayit namozini ado etish, jamoatga qulaylik va zarur shart-sharoitlarni hozirlash uchun qizg‘in tayyorgarlik ishlari olib borildi. Sanitariya-gigiyena talablari, texnik xavfsizlik choralari hamda obodonlashtirish ishlari amalga oshirildi. Qabriston va ziyoratgohlarga ham alohida e’tibor berildi.
Ertangi Qurbon hayiti namozini o‘qish uchun Farg‘ona viloyatidagi 193 ta masjid shay holatga keltirildi. Viloyat bosh imom-xatibi Ubaydulloh domla Abdullayev haj safarida bo‘lgan imom-xatiblar o‘rniga tayinlangan imom-noiblari bilan muloqot o‘tkazib, hayit namozini o‘qish tartibi, mav’iza va xutbalarni ado etish tartiblari bo‘yicha kerakli ko‘rsatma va maslahatlarni berdi.
Qurbon hayiti namozi o‘qilishi munosabati bilan masjidlarga kelib-ketishda aholiga qulaylik yaratish maqsadida viloyat Transport boshqarmasi tomonidan shaharlardagi mavjud jamoat transporti (avtobus) faoliyati tonggi soat 03:00 dan boshlab yo‘lga qo‘yiladi.
Bundan tashqari hozirgi kunda, Farg‘ona shahridagi “Muhammad Avliyo”, Marg‘ilon shahridagi “Xoja Porso”, O‘zbekiston tumanidagi “O‘qchi”, So‘x tumanidagi “Xazrati ali”, Quva tumanidagi “Abu Hanifa” va Buvayda tumanidagi “Mansurxon to‘ra” masjidlarida qurilish ishlari olib borilayotganligi va ushbu masjidlarda “Qurbon hayiti” namozi o‘qilmasligini inobatga olib, ushbu hududdagi fuqarolarga qulaylik yaratish maqsadida, viloyat Transport boshqarmasi hamda IIB JHX YXHB hamkorlikda, xududlarda faoliyat ko‘rsatayotgan boshqa masjidlarga fuqarolarni o‘z vaqtida xavfsiz yetkazib qo‘yish uchun, tonggi soat 03:00 dan boshlab vaqtinchalik avtobus qatnovlari tashkil etiladi.
Farg‘ona viloyatida Qurbon hayiti namozi 16 iyun kuni 05:00 da o‘qiladi.
Fursatdan foydalanib, Farg‘ona viloyati vakilligi yurtimiz mo‘min-musulmonlarini Qurbon hayiti bilan samimiy muborakbod etadi.
