Ўзбекистон “Veteran” жангчи-фахрий ва ногиронлари бирлашмаси Афғонистон ҳамда бошқа чегараланган ҳудудлардаги ҳарбий ҳаракатларда иштирок этган, Ўзбекистон жангчи-фахрийлари, уруш ногиронлари ва ҳалок бўлган жангчиларнинг оила аъзоларини ижтимоий жиҳатдан ҳимоялаш бўйича Давлат дастурларини амалга оширишда фаол иштирок этиб келмоқда.
Шу йил 16 феврал куни Фарғона шаҳрида Ўзбекистон “Veteran” жангчи-фахрий ва ногиронлари бирлашмаси томонидан Афғон уруши қатнашчилари учун тадбир ташкил этилди. Унда вилоятимизда истиқомат қилиб келаётган Афғон уруши қатнашчилари, вилоят ва шаҳар ҳокимлиги мутасаддилари, шаҳар бош имом-хатиби Жўрабек домла Рахмонов иштирок этди.
Ўтказилган тадбирда вилоят ва шаҳар «Ветеран» бирлашма раислари сўзга чиқиб, Афғон урушида ҳалок бўлган ўғлонларни ёдда сақлаш инсоний бурчимиз эканини, гарчи қўшинлар олиб чиқилганига ўттиз уч йил бўлса-да, жигарбандидан айрилган оналарнинг кўз ёшлари қуриб битганича йўқ. Маълумотларга кўра, Афғон урушида 65 минг нафар ўзбек йигитлари қатнашиб, 1500 нафардан кўпроғи ҳалок бўлган. Уларнинг аксари 18-19 ёшли йигитлар.
Таъкидлаш лозимки, Фарғона шаҳрида фаолият олиб бораётган имом-хатиблар, имом-ноиблари ташаббуси билан Ўзбекистон “Veteran” жангчи-фахрий ва ногиронлари бирлашмаси Фарғона шаҳар бўлинмаси ҳисобида турувчи бир нечта фахрийларга моддий ёрдамлар кўрсатилди. Аллоҳ таоло Қуръони каримда шундай марҳамат қилади:
“Эзгулик ва тақво (йўли)да ҳамкорлик қилингиз, гуноҳ ва адоват (йўли)да ҳамкорлик қилмангиз! Аллоҳдан қўрқингиз! Албатта, Аллоҳ азоби қаттиқ зотдир” (Моида сураси 2-оят).
Шунингдек, тадбирда Фарғона шаҳар бош имом-хатиби Жўрабек домла Рахмонов сўзга чиқиб, “Тинчликнинг улуғ неъмат” эканини, тинчлик учун ўз жонидан воз кечиб бўлса ҳам фидокорлик кўрсатган Афғон уруши қатнашчиларини муборакбод этди. Шу йўлда вафот этиб кетган юртдошларимиз учун Қуръон тиловат қилиб ҳақларига дуолар қилинди.
Тадбир якунида Ўзбекистон “Veteran” жангчи-фахрий ва ногиронлари бирлашмаси томонидан шаҳар бош имом-хатибига “Ёшларни ватанпарварлик руҳида тарбиялаш учун” медали билан тақдирланди. Албатта, бу медал шаҳримизда фаолият олиб бораётган имом-хатиблар ва имом-ноибларнинг меҳнати самарасидир.
