Бугун пойтахтимиздаги Маърифат марказининг Симпозиумлар саройида Ўзбекистондаги Ислом цивилизацияси маркази томонидан “Буюк аждодлар мероси – III Ренессанс асоси” Ўзбекистон олимлари форуми ўз ишини давом эттирди.
Куннинг биринчи ярмида илмий анжуманнинг ялпи йиғилиши бўлиб ўтди. Унда Ўзбекистон Республикаси Сенати ва Олий Мажлиси аъзолари, Президент маслаҳатчилари, Ўзбекистон Ислом цивилизацияси маркази, Фанлар академияси ва бир қатор илмий-тадқиқот институт мутасадди ва профессор-ўқитувчилари, олимлар, уламолар, диний соҳа мутахассислари иштирок этди.
Анжуманда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари сўзга чиқиб: “Биз аждодларимиз билан доимо фахрланиб келамиз. Энди уларга муносиб бўлиш вақти келди. Ўзбекистондаги Ислом цивилизацияси марказида бунинг учун барча шароитлар муҳайё этилади, етук уламолар иштирокида учрашувлар қиламиз, илмий суҳбатлар қурамиз.
Марказда аждодларимизнинг асарлари тадқиқ этилади, таржималари амалга оширилади, таҳлил қилинади. Ушбу мақсадда Ўзбекистоннинг энг етакчи олимлари, мутахассислари, илмий изланувчилари, ҳатто хорижнинг етук алломалари жалб қилинади. Шу боис ушбу марказ юртимизда илмий изланиш олиб бораётган тадқиқотчиларнинг энг муҳим масканига айланишига ишонамиз”, дея таъкидлаб, Ўзбекистондаги Ислом цивилизацияси маркази келгусида чин маънода III Ренессанс асоси бўлишга умид билдирди.
Илмий анжуман давомида сўзга чиққанлар, Президентимизнинг бевосита ташаббуслари билан барпо этилаётган Ўзбекистондаги Ислом цивилизацияси маркази Марказий Осиёда ягона экани, у келгусида III Ренессанснинг маънавий-марифий устунларидан бирига айланиши ва бунинг учун бугунги кун олимлари олдида катта вазифалар тургани ҳақида фикр-мулоҳазалар билдирилди.
Куннинг иккинчи ярмида форум шўъбаларга бўлинган ҳолда давом этди. Ўзбекистон Ислом цивилизацияси марказининг келгуси фоаолиятига оид бағишланган семинарлар ва тақдимотлар бўлиб ўтди.
Форумда Ўзбекистон мусулмонлари идорасининг уламо ва имом-хатиблари фаол қатнашиб, мавзулар доирасида ўзининг таклиф ва мулоҳазаларини билдирдилар.
Эслатиб ўтамиз, вилоят боши имом-хатиби Убайдуллоҳ домла Абдуллаев ҳам ушбу форумда иштирок этмоқда.
* * *
Bugun poytaxtimizdagi Ma’rifat markazining Simpoziumlar saroyida O‘zbekistondagi Islom sivilizatsiyasi markazi tomonidan “Buyuk ajdodlar merosi – III Renessans asosi” O‘zbekiston olimlari forumi o‘z ishini davom ettirdi.
Kunning birinchi yarmida ilmiy anjumanning yalpi yig‘ilishi bo‘lib o‘tdi. Unda O‘zbekiston Respublikasi Senati va Oliy Majlisi a’zolari, Prezident maslahatchilari, O‘zbekiston Islom sivilizatsiyasi markazi, Fanlar akademiyasi va bir qator ilmiy-tadqiqot institut mutasaddi va professor-o‘qituvchilari, olimlar, ulamolar, diniy soha mutaxassislari ishtirok etdi.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari so‘zga chiqib: “Biz ajdodlarimiz bilan doimo faxrlanib kelamiz. Endi ularga munosib bo‘lish vaqti keldi. O‘zbekistondagi Islom sivilizatsiyasi markazida buning uchun barcha sharoitlar muhayyo etiladi, yetuk ulamolar ishtirokida uchrashuvlar qilamiz, ilmiy suhbatlar quramiz.
Markazda ajdodlarimizning asarlari tadqiq etiladi, tarjimalari amalga oshiriladi, tahlil qilinadi. Ushbu maqsadda O‘zbekistonning eng yetakchi olimlari, mutaxassislari, ilmiy izlanuvchilari, hatto xorijning yetuk allomalari jalb qilinadi. Shu bois ushbu markaz yurtimizda ilmiy izlanish olib borayotgan tadqiqotchilarning eng muhim maskaniga aylanishiga ishonamiz”, deya ta’kidlab, O‘zbekistondagi Islom sivilizatsiyasi markazi kelgusida chin ma’noda III Renessans asosi bo‘lishga umid bildirdi.
Ilmiy anjuman davomida so‘zga chiqqanlar, Prezidentimizning bevosita tashabbuslari bilan barpo etilayotgan O‘zbekistondagi Islom sivilizatsiyasi markazi Markaziy Osiyoda yagona ekani, u kelgusida III Renessansning ma’naviy-marifiy ustunlaridan biriga aylanishi va buning uchun bugungi kun olimlari oldida katta vazifalar turgani haqida fikr-mulohazalar bildirildi.
Kunning ikkinchi yarmida forum sho‘balarga bo‘lingan holda davom etdi. O‘zbekiston Islom sivilizatsiyasi markazining kelgusi foaoliyatiga oid bag‘ishlangan seminarlar va taqdimotlar bo‘lib o‘tdi.
Forumda O‘zbekiston musulmonlari idorasining ulamo va imom-xatiblari faol qatnashib, mavzular doirasida o‘zining taklif va mulohazalarini bildirdilar.
Eslatib o‘tamiz, viloyat boshi imom-xatibi Ubaydulloh domla Abdullayev ham ushbu forumda ishtirok etmoqda.
