Бугун – Ислом умматининг энг улуғ кунларидан бири. Дунё бўйлаб келган миллионлаб мусулмонлар каби, юртимиздан борган ҳожилар ҳам Арафот майдони сари йўл олиб, Ҳаж ибодатининг муҳим фарзларидан бири – Арафотда туриш амалини адо этишга киришдилар.
Арафот – тавба ва илтижолар макони, инсоннинг қалби, виждони, нияти юзага чиқадиган муқаддас макон. Пайғамбаримиз Муҳаммад Мустафо соллаллоҳу алайҳи васалламнинг “Ҳаж – Арафотдир” деган ҳадислари бу амалнинг нақадар муҳим эканини кўрсатади.
Юртимиз, хусусан, вилоятимиздан борган ҳожилар Арафотда эҳромда туриб, бутун вужудлари, бутун қалблари билан Аллоҳга юзланмоқдалар. Уларнинг оғизларида истиғфор, тилларида Қуръон тиловати, қалбларида умид ва тавба…
Бу ерда қилинган дуолар рад этилмаслиги ҳақида Расулуллоҳ соллаллоҳу алайҳи васаллам хабар берганлар. Шунинг учун ҳам Арафотда ҳар бир мусулмон ўз ҳаётини қайта баҳолайди, ўтмиш хатолари учун афв сўрайди ва пок ният билан янги ҳаётга йўл олади.
Айнан шу кунда юртимиздан борган ҳожиларимиз ҳам юрт тинчлиги, оила баракаси, фарзандлар солиҳлиги, Ватан равнақи учун дуо қилмоқдалар. Улар нафақат ўзлари, балки орқада қолган қариндош-уруғ, қўшни ва бутун юртдошлари учун ҳам илтижо қилмоқдалар.
Арафот – гуноҳлар ювиладиган, қалблар покланадиган, муҳаббат, тавба ва руҳий уйғониш куни. Илоҳим, ҳожиларимизнинг қилган дуолари ижобат бўлсин! Улуғ ибодат – Ҳаж қабул бўлиб, ҳар бир мусулмонни жаннат бахтига муяссар этсин!
***
Bugun – Islom ummatining eng ulug‘ kunlaridan biri. Dunyo bo‘ylab kelgan millionlab musulmonlar kabi, yurtimizdan borgan hojilar ham Arafot maydoni sari yo‘l olib, Haj ibodatining muhim farzlaridan biri – Arafotda turish amalini ado etishga kirishdilar.
Arafot – tavba va iltijolar makoni, insonning qalbi, vijdoni, niyati yuzaga chiqadigan muqaddas makon. Payg‘ambarimiz Muhammad Mustafo sollallohu alayhi vasallamning “Haj – Arafotdir” degan hadislari bu amalning naqadar muhim ekanini ko‘rsatadi.
Yurtimiz, xususan, viloyatimizdan borgan hojilar Arafotda ehromda turib, butun vujudlari, butun qalblari bilan Allohga yuzlanmoqdalar. Ularning og‘izlarida istig‘for, tillarida Qur’on tilovati, qalblarida umid va tavba…
Bu yerda qilingan duolar rad etilmasligi haqida Rasululloh sollallohu alayhi vasallam xabar berganlar. Shuning uchun ham Arafotda har bir musulmon o‘z hayotini qayta baholaydi, o‘tmish xatolari uchun afv so‘raydi va pok niyat bilan yangi hayotga yo‘l oladi.
Aynan shu kunda yurtimizdan borgan hojilarimiz ham yurt tinchligi, oila barakasi, farzandlar solihligi, Vatan ravnaqi uchun duo qilmoqdalar. Ular nafaqat o‘zlari, balki orqada qolgan qarindosh-urug‘, qo‘shni va butun yurtdoshlari uchun ham iltijo qilmoqdalar.
Arafot – gunohlar yuviladigan, qalblar poklanadigan, muhabbat, tavba va ruhiy uyg‘onish kuni. Ilohim, hojilarimizning qilgan duolari ijobat bo‘lsin! Ulug‘ ibodat – Haj qabul bo‘lib, har bir musulmonni jannat baxtiga muyassar etsin!
