Бу ҳақда АОКАда ўтказилган брифингда Дин ишлар бўйича қўмита бўлим бошлиғи Сирожиддин Саломов маълум қилди.
Бугунги брифингда ўтган 2022 йил давомида Дин ишлари бўйича қўмита томонидан амалга оширилган ишлар ҳақидаги маълумотларни тақдим этамиз.
Буюк аждодларимизнинг бой илмий-маънавий меросини кенг тарғиб қилиш мақсадида юртимиздан етишиб чиққан алломаларнинг 23 та асарлари халқчил таржимаси амалга оширилди ҳамда уларнинг меросидаги ёшларни комил инсон этиб тарбиялаш, бағрикенглик маданиятини ривожлантиришга қаратилган 27 та илмий-оммабоп рисолалар нашр этилди.
Ўзбекистон халқаро ислом академияси ҳузуридаги
Малака ошириш марказида 3 минг 80 нафар диний соҳа ходимлари ҳамда манфаатдор идоралар мутахассисларининг малакаси оширилди.
Якунланган йилда исломшунослик ва манбашунослик соҳасида 24 та фалсафа доктори ҳамда фан докторлик диссертациялари ҳимоя қилинди.
Халқаро илмий-тадқиқот марказлари вакиллари, исломшунос олимлар ва тадқиқотчиларнинг диний-маърифий соҳаларга оид Туркия, АҚШ, Буюк Британия, Германия, Франция, Саудия Арабистони, Миср, Малайзия, Индонезия, Сингапур, Афғонистон, Россия, Қозоғистон, Қирғизистон, Тожикистон, Озарбайжон каби давлатларининг турдош ташкилотлари билан ҳамкорликда ташкил этилган 129 та (жумладан, конференция, учрашув, давра суҳбати,
илмий семинарлар каби) тадбирларида оффлайн ва онлайн иштироки таъминланди.
АЙСEСКО, ЮНEСКО ва ИРСИКА каби дунёнинг нуфузли халқаро ташкилотлари, илмий-тадқиқот марказлари ва университетлари билан ҳамкорликда “Янги Ўзбекистон – Учинчи Ренессанс” шиори остида Бирлашга Араб Амирликлари, Туркия, Ўмон Султонлиги, Малайзия ва Қувайт каби давлатларда 6 тадан ортиқ халқаро илмий-амалий анжуманлар ўтказилди.
“Янги Ўзбекистон ёшлари ва учинчи ренессанс” мавзусида Ўмон Султонлиги, Буюк Британия, Туркия, Миср каби давлатларда таҳсил олаётган ўзбекистонлик ёшлар иштирокида 10 дан ортиқ конференция ва давра суҳбатлари ўтказилди.
Мутасадди вазирлик ва идоралар ҳамкорлигида фуқароларимиз учун Ҳаж ва Умра зиёратлари юқори савияда ташкил этилиб, 2022 йилда 12 045 нафар зиёратчилар Ҳаж амалларини, 61 мингдан ортиқ зиёратчилар Умра амалларини адо этишди.
Таъкидлаш керакки, фуқароларимизнинг муқаддас зиёратга бўлган эҳтиёжларини тўлақонли қондириш мақсадида Жамоатчилик кенгаши қарори асосида Ҳаж ва Умра сафарларини ташкил этиш янги босқичга кўтарилди.
Хусусан, Умра сафарига борувчи зиёратчилар сонини белгилаш бўйича квота олиб ташланди, натижада республикамизнинг айрим ҳудудларида навбатлар тугатилди, баъзиларида эса навбатларининг сезиларли даражада камайишига эришилди.
Қайд этиш керакки, ҳисобот даврида диний конфессиялар раҳбарлари ва вакилларининг 33 та турли халқаро ва маҳаллий тадбирлардаги иштироки таъминланди, улар иштирокида
6 та телекўрсатув, 59 та интервью тасвирга олиниб, марказий телеканаллар орқали намойиш этилди. Уларнинг диний байрам, тадбир ва маросимларини ўтказишда амалий ёрдам кўрсатилди.
Аҳоли эҳтиёжидан келиб чиқиб, ҳудудларда 19 та янги диний ташкилотлар ўз фаолиятини бошлади. Жумладан, 50 та диний ташкилотда тубдан қайта қуриш, 38 тасида таъмирлаш ишлари якунланди, 321 та бинода қурилиш-таъмирлаш ишлари давом этмоқда.
Шу ўринда давлатимиз раҳбарининг Олий Мажлис ва Ўзбекистон халқига Мурожаатномасидаги қуйидаги нутқларини ётга олиш жоиз: “Бутун дунёда кучайиб бораётган радикализм, экстремизм, терроризм, одам савдоси, гиёҳвандлик каби хатарлар, афсуски, бизни ҳам четлаб ўтмаяпти. Биз жамиятимизда ҳар қандай радикаллашувга, ёшларимиз онгини бузғунчи ёт ғоялар билан заҳарлашга, диндан сиёсий мақсадларда фойдаланишга, маърифат ўрнини жаҳолат эгаллашига йўл қўймаймиз”.
Қайд этиш керакки, ҳисобот даврида ушбу йўналишда ҳам салмоқли ишлар амалга оширилди. Жумладан, “Жаҳолатга қарши маърифат” шиори остида давлат ва жамоат ташкилотларида 962 минг нафар фуқаролар иштирокида
14 мингта тадбирлар ҳамда 183 та давлат ва нодавлат олий ва ўрта-махсус таълим муассасаларида 100 минг нафар ўқувчи, талаба, профессор-ўқитувчи ва ходимлар иштирокида маънавий-маърифий тадбирлар ташкил қилинди.
Реабилитация қилиш ва ижтимоий мослаштиришга муҳтож бўлган 6 минг 611 нафар шахслар ва уларнинг оила аъзолари билан 18 мингта профилактик тадбирлар ўтказилди.
Соғлом маънавий-маърифий тарғибот самарадорлигига эришиш ва ахборот хуружларининг олдини олиш, ислом динининг асл инсонпарварлик ғояларини асраб-авайлаш ва виждон эркинлигини кафолатлаш, диний бағрикенгликни таъминлашга оид веб-сайт, ижтимоий тармоқ саҳифалари ва телеграм каналларида 181 мингта хабар, мақола ва бошқа кўринишдаги материаллар жойлаштирилди.
Бундан ташқари, диний соҳа ходимлари томонидан “жаҳолатга қарши маърифат” йўналишида интернет сайтларда 138 мингта, босма нашрларда 3 437 та, радиода 2 357 та ва телевидениеда 3 823 та ақидапараст оқимларга қарши илмий жиҳатдан асосланган чиқишлар қилинди.
Республикадаги диний-маърифий соҳада амалга оширилаётган ислоҳотларни нохолис талқин этиш, уламоларни обрўсизлантиришга қаратилган ҳаракатларга қарши мафкуравий курашни тизимли ташкил этиш мақсадида диний-маърифий сайтларда 8 мингта (видео, аудио, мақола ва инфографика кўринишидаги) материаллар эълон қилинди.
