Одатда «Қиз бола бировнинг хасми, эрга тегиб кетади», деган гап бор. «Ўғил бола эса доимо хизматда бўлади. Уни уйлантириб қўйсанг, келин ҳам кунингга ярайди» каби тушунчалар ҳам йўқ эмас.
Расулуллоҳ соллаллоҳу алайҳи ва саллам қизларга нафақа қилишнинг фазли ҳақида ҳадисларида қайта-қайта баён қилганлар. Ўзлари тўрт қизларига қилган муомалалари билан барчага намуна бўлганлар.
Зуҳрийдан ривоят қилинади. Расулуллоҳ соллаллоҳу алайҳи ва саллам: «Кимнинг икки қизи бўлса ва уларнинг машаққатларига ва нафақасига сабр қилса, уларга қилган нафақаси учун унга жаннат бўлади», дедилар.
Бир қизни солиҳа қилиб вояга етказиш осон эмас. Бу учун сабр-матонат, ҳаракат, ғайрат, топганини сарфлаш керак. Барибир шу қиз эртами, индинми, бировнинг уйига кетиши, келин бўлиши борлигини ўйлаб, юрак увишиб ҳам туради. Айниқса, қизи кўп бўлса, бу ҳолат аниқ билинади. Шуларни билиб, сабр этиб, қизларини яхши тарбиялаган кўп ажрга эга бўлади. Икки қизнинг тарбиясидаги машаққатларга, хусусан, қизларнинг нафақасини таъминлашдаги қийинчиликларга сабр қилиш ота-она учун катта савоб ҳамда жаннатга киришга сабаб бўладиган амаллардан бири ҳисобланади.
«Яхшилик ва силаи раҳм» китобидан
***
Odatda «Qiz bola birovning xasmi, erga tegib ketadi», degan gap bor. «O‘g‘il bola esa doimo xizmatda bo‘ladi. Uni uylantirib qo‘ysang, kelin ham kuningga yaraydi» kabi tushunchalar ham yo‘q emas.
Rasululloh sollallohu alayhi va sallam qizlarga nafaqa qilishning fazli haqida hadislarida qayta-qayta bayon qilganlar. O‘zlari to‘rt qizlariga qilgan muomalalari bilan barchaga namuna bo‘lganlar.
Zuhriydan rivoyat qilinadi. Rasululloh sollallohu alayhi va sallam: «Kimning ikki qizi bo‘lsa va ularning mashaqqatlariga va nafaqasiga sabr qilsa, ularga qilgan nafaqasi uchun unga jannat bo‘ladi», dedilar.
Bir qizni soliha qilib voyaga yetkazish oson emas. Bu uchun sabr-matonat, harakat, g‘ayrat, topganini sarflash kerak. Baribir shu qiz ertami, indinmi, birovning uyiga ketishi, kelin bo‘lishi borligini o‘ylab, yurak uvishib ham turadi. Ayniqsa, qizi ko‘p bo‘lsa, bu holat aniq bilinadi. Shularni bilib, sabr etib, qizlarini yaxshi tarbiyalagan ko‘p ajrga ega bo‘ladi. Ikki qizning tarbiyasidagi mashaqqatlarga, xususan, qizlarning nafaqasini ta’minlashdagi qiyinchiliklarga sabr qilish ota-ona uchun katta savob hamda jannatga kirishga sabab bo‘ladigan amallardan biri hisoblanadi.
«Yaxshilik va silai rahm» kitobidan
