Сиз учун нима муҳим?

Олти-етти йил аввал эди. Автобусдайдим. Ёнимга уч-тўрт ёшлардаги ўғли билан бир аёл ўтирди. Болакай жуда қизиқувчан эди. Тинмай савол берар, онаси эса уларнинг ҳар бирига эринмай, атрофлича жавоб қайтарарди…

Яқинда жамоат транспортида кетарканман яна шундай воқеага гувоҳ бўлдим. Кичкинтойи билан автобусга чиққан аёл рўпарамдаги ўриндиққа чўкди. Ўтирар-ўтирмас сумкасидан телефон чиқариб, тинимсиз келиб турган мактубларга жавоб қайтара бошлади. Шу пайт болакай:

– Ойи, мана бу катта машина “КАМАЗ”ми? – деди автобус билан ёнма-ён кетаётган “ЗИЛ” уловига ҳайрат билан қараб.

Она зарда билан “Жим!” деди ва бошини кўтармай ижтимоий тармоқдаги дугоналари билан фикр алмашишда давом этди. Бола индамай қолди. Бир оз жим юргач, яна гап бошлади:

– Бу Ҳикмат акамнинг ишхонасими?

– Халал берма!

Она ҳали ҳам банд.

Ўғли учинчи марта гап бошлаганида она айёрона йўл тутди.

– Планшетингни олиб берайми?

Жавобни ҳам кутмай сумкасидан каттакон планшет олди-да, қўлига тутқазди. Манзилимга етгунча болакайнинг овозини бошқа эшитмадим. Фақат у ўйнаётган ўйиндага ўқ товушларию ҳар хил қичқириқлар қулоғимда қолиб кетди…

Она учун боласининг сўровларидан ҳам муҳим бўлиб қолган ижтимоий тармоқларда бунчалар қизиқарли нима бор? Шу оғриқли ўй билан компьютер қаршисига ўтирдим: аксарият хабарлар уй бекаларидан. Бугун нима овқат қилгани, унинг тайёрланиш усули, фарзандларининг турли суратлари… ва кимдандир чеккан озорларию оилавий муаммоларигача муҳокамада…

Бандалар вақтидан барака олиб қўйилиши қиёмат аломатларидан бири. Биз эса шундоқ ҳам баракасиз фурсатларимизни интернетдаги фойдасиз, маънисиз суҳбатларга сарф қиляпмиз. Кун ўтгани сари уларга боғланиб боряпмиз. Топганимиз эса ҳам моддий, ҳам маънавий зарар. Энг ёмони – оиламиз ҳақида кўпчилик олдида ёзишдан тап тортмаяпмиз. Уйдаги гапни кўчага олиб чиқмаслик ҳақидаги қадриятимиз қадри қаерда қолди?

“Уй бекаларига интернет нега керак ўзи?” деган саволга ҳар қанча уринсам ҳам жавоб тополмадим. Кўнглимдан шундай ўйлар ўтди: “Дугоналар, сиз аввало онасиз, бир уйнинг бекасисиз. Эрингиз уйини, болалари, мол-мулкини сизга ишониб топширган. Икки дунёнгиз учун фойдали вазифаларни, фарзанд тарбиясини четга суриб қўйиб, ижтимоий тўрга ўралиб қолишингиз тўғримикан?

Қуш уясида кўрганини қилади, дейдилар. Яъни, болаларингиз сизнинг ҳар бир ҳаракатингиздан, гап-сўзингиздан ўрнак олади. Эрта бир кун надомат чекмаслик учун ўзимизни бугун тузатайлик.

Кўзини телефондан ололмаётган тенгдошим, бир зум тўхтанг! Дугонангизнинг куни сизнинг суҳбатингизсиз ҳам ўтар, бироқ ёнингиздаги гўдак меҳрингизсиз, уни тўғри йўлга соладиган билимларингизсиз нима қилади? Уни эътиборсиз қолдирманг, саволларига жавоб беринг. Катта тезликда шовқин солиб ўтиб бораётган машина “КАМАЗ” эмас, “ЗИЛ”лигини айтинг!”

Нигора Мирзаева | irfon.uz